އޭޝިއަން ފުޓުބޯޅަ ފެޑެރޭޝަން (އޭއެފްސީ) އިން އޭޝިއާގެ ތިން ވަނަ ދަރަޖައިގެ ޓީމުތަކަށް ތައާރަފްކުރި  އޭއެފްސީ ޗެލެންޖާސް ލީގުގެ ގްރޫޕު ސްޓޭޖުގައި ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ހިމެނައިފިއެވެ. މާޒިޔާއަށް މި ފުރުސަތު ލިބިފައިވަނީ، ދިވެހި ލީގުގެ އެންމެ ފަހުގެ ޗެމްޕިއަނުންގެ ހައިސިއްޔަތުންނެވެ.

ސަރަހައްދީ  ކުލަބު ފުޓުބޯޅައިގައި މިހާތަނަށް ރާއްޖެއަށް ފުރުސަތު ލިބެމުން އައީ އޭޝިއަން ކަޕުންނެވެ. އެއީ އޭޝިއާގެ ދެވަނަ ފަންތީގެ ޓީމުތަކަށް ކުރިޔަށް ގެންދާ މުބާރާތެވެ. ނަމަވެސް އޭއެފްސީން ގެނެސްފައިވާ ބަދަލުތަކާއެކު ރާއްޖޭގެ ކުލަބުތަކަށް ދެން ފުރުސަތު ލިބޭނީ ތިންވަނަ ފަންތީގެ މުބާރާތުންނެވެ.

މާޒިޔާ ލައްވާލާނެކަމަށް މީގެކުރިން ބެލެވުނީ ޗެލެންޖާސް ލީގުގެ ޕްލޭއޮފުން ކަމަށެވެ. ނަމަވެސް ލީގު ފޯމެޓާއި ޕްރިލިމިނަރީ މެޗު ޝެޑިއުލް އިއުލާނުކުރިއިރު، މާޒިޔާ ވަނީ ގްރޫޕް ސްޓޭޖުގެ ފުރުސަތު ލިބޭ ޓީމުތަކުގެ ތެރޭގައި ހިމަނާފައެވެ.

ޗެލެންޖާސް ލީގުގެ ގްރޫޕު ސްޓޭޖުގައި މާޒިޔާގެ އިތުރުން މި ސަރަހައްދުގެ ޓީމަކަށް ދެން ހިމެނެނީ ބަންގްލަދޭޝްގެ ބަޝުންދަރާ ކިންގްސް އެވެ. ދެން މި ސަރަހައްދުގެ ޓީމުތަކުގެ ތެރެއިން ޗެލެންޖާސް ލީގުގެ ޕްލޭއޮފް ބުރުގައި ހިމެނެނީ ބޫޓާންގެ ޕާރޯ އެފްސީ އާއި ނޭޕާލުގެ ޗާޗް ބޯއީސް ޔުނައިޓެޑެވެ.