ސްޓެލްކޯގެ އިންޖީނުގެތަކުގެ މެނޭޖަރުންނަށް މަހާސިންތާއެއް ބާއްވައިފިއެވެ. ފަސް ދުވަހުގެ މުއްދަތަށް، ޖޫން 30 އިން ޖުލައި 4 އަކަށް، "ޑިވެލޮޕްމަންޓް ޕްރޮގްރާމް ފޯ ސްޓޭޝަން މެނޭޖާރސް" ގެ ނަމުގައި އެ ކުންފުނިން ބޭއްވި މި މަހާސިންތާގައި 33 ރަށެއްގެ ސްޓޭޝަން މެނޭޖަރުން ވަނީ ބައިވެރިވެފައެވެ.

މި މަހާސިންތާގައި ސްޓެލްކޯއިން ވަނީ އެ ކުންފުނީގެ އިންޖީނުގެތައް ހިންގުމުގެ އިންތިޒާމުތައް އެއްހަމަ ކުރުމަށް އެކުލަވާލާފައިވާ "ސްޓެލްކޯ އިންޖީނުގެތައް ހިންގާނެ ގޮތުގެ އަތްމަތީ ފޮތް" ވެސް އިފްތިތާހުކޮށްދެއްވާފައެވެ. މި އަތްމަތީ ފޮތް އިފްތިތާހު ކޮށްދެއްވީ އެ ކުންފުނީގެ މެނޭޖިންގ ޑިރެކްޓަރ ހުސައިން ފަހުމީއެވެ. އިންޖީނުގެތައް ހިންގާނެ ގޮތުގެ ތަފްސީލުތަކުގެ އިތުރުން، މި ފޮތުގައި ކުންފުނީގެ ޚިދުމަތުގެ ތާރީޙާއި، ތަސައްވުރާއި، އަމާޒުގެ އިތުރުން، އިންޖީނުގެތަކުގެ އޮނިގަނޑާއި، އިންޖީނުގެތަކުގެ މަސައްކަތްތަކާއި، ކުންފުނީގެ އެކި ދާއިރާތަކުގެ އޮނިގަނޑުގެ އިތުރުންވެސް ކުންފުންޏާއި ގުޅޭ ގިނަ މައުލޫމާތުތަކެއް ހިމަނާފައިވާނޭ ކަމަށް އެ ކުންފުނިން މައުލޫމާތު ދެއެވެ.

ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވާހަކަފުޅު ދެއްކެވިއެވެ.

ސްޓޭޝަން މެނޭޖަރުންގެ މަހާސިންތާ ނިންމުމަށް ބޭއްވި ރަސްމިއްޔާތުގައި މެނޭޖިންގ ޑިރެކްޓަރ ހުސައިން ފަހުމީ ވަނީ، ކުންފުނީގެ ކުރިމަގަށް އެ ބޭފުޅާ ދެކޭ ތަސައްވުރަށް ވެސް އަލިވަޅުވާލާފައެވެ.

ފަހުމީ އިތުރަށް ފާހަގަ ކުރެއްވީ، ކުންފުންޏަށް ބަދަލު ގެންނަންޖެހޭ ވަގުތު އަތުވެއްޖެކަމަށާއި، އެ ބަދަލަކީ މިހާރަށް ވުރެ ބޮޑު ކުރިއެރުންތަކެއް ހޯދުންކަމަށާއި އަދި އެކަމަށް ފުރިހަމަ އުއްމީދު އެބައޮތް ކަމަށެވެ.

މި މަހާސިންތާގައި ވަނީ ލީޑަރޝިޕް ސްކިލްސް ދަސްކޮށްދިނުމުގެ އިތުރުން ދިރިއުޅުމުގެ ވައްޓަފާޅިއަށް ގެންނަ ބަދަލުތަކުން ހަކަތަ ރައްކާތެރިކުރުމަށް ކުރެވިދާނެ ކަންކަމަށް ރައްޔިތުން ހޭލުންތެރިކުރުމާއި ގުޅޭގޮތުންނާއި، ރައްޔިތުންނަށް ޚިދުމަތް ދިނުމުގައި ދިމާވާ ދަތިތަކަށް އަލިއަޅުވާލައި، އެ ދަތިތައް ހައްލުކޮށް ހިދުމަތް ފުރިހަމަކަމާއިއެކު އަވަސްކުރުމަށް ކުރެވިދާނެ ކަންކަމާއި މެދު މަޝްވަރާކޮށްފައެވެ.