އެކި ބާވަތްތަކުގެ އެނާޖީ ޑްރިންކްތައް ރާއްޖެ އެތެރެ ކުރުމަށް ދެވިފައި ހުރި ލުއިތައް މިއަންނަ އޮގަސްޓް މަހުގެ އެއްވަނަ ދުވަހުންފެށިގެން އުވާލާނެ ކަމުގައި މޯލްޑިވްސް ކަސްޓަމްސް ސަރވިސަސްއިން ހާމަކުރައްވައިފިއެވެ.

ދައުލަތުގެ މީޑިއާ ޕީއެސްއެމްގެ ރާއްޖެ މިއަދު ޕްރޮގްރާމްގައި ބުރާސްފަތި ދުވަހުގެ ރޭ ބައިވެރިވެ ވަޑައިގެން، ކަސްޓަމްސްގެ ޑެޕިއުޓީ ޗީފް ސުޕްރިންޓެންޑެންޓް ނިޔާޒް ދެއްކެވި ވާހަކަފުޅުގައި ވިދާޅުވީ، އެނާޖީ ޑްރިންކްގެ އިތުރުން ވޭޕާއި، ދުންފަތުގެ ބާވަތްތަކަށްވެސް ލިބިފައި ހުރި ލުއިތައް އުވާަލެވޭނެ ކަމަށެވެ. މިގޮތުން އެތަކެއްޗަކީ، އާއްމު ޞިއްޙަތަށް ނުރައްކާހުރި ތަކެތިކަމަަށްވާތީ، މިހާރު ލިބެން ހުރި ލުއިތައްވެސް އުވާލުމަށް ނިންމާފައި ވަނީ، އާއްމު ޤަވާއިދަށް ގެނެވުނު އިސްލާޙްތަކުގެ ދަށުން ކަމަށެވެ.

އެނާޖީ ޑްރިންކް ބުއިމާއި، ވޭޕާއި ދުންފަތުގެ އިސްތިއުމާލު ކުރުމަކީ، ދިވެހިންގެ މެދުގައި ވަރަށް ބޮޑަށް ހިފާފައި އޮތް ނުރަނގަޅު އާދައެއް ނަމަވެސް އެބާވަތްތައް ރާއްޖެއަށް އެތެރެކޮށްގެން، އިމްޕޯޓް ޑިއުޓީގެ ގޮތުގައި ސަރުކާރަށް ބޮޑު އާމްދަނީއެއް ލިބެއެވެ.

ޞިއްޙީ ހޭލުންތެރިކަން އިތުރު ކުރުމަށް މަސައްކަތް ކުރާ ފަރަތްތަކުން އަންނަނީ އެ ބާވަތްތައް ރާއްޖެ އެތެރެކުރުން ހުއްޓުވުމަށްވެސް ގޮވާލައި ބާރުއަޅަމުންނެވެ.