މާލޭގައި އިންޖީނުލީ އެއްގަމު އުޅަނދު ފަހަރު ދުއްވޭނެ އަދަދާއި، އުމުރު ކަނޑައެޅުމަށް ބޭނުންވާ ދިރާސާކޮށްދޭނެ ފަރާތެއް ހޯދުމަށް މާލޭ ސިޓީ ކައުންސިލުން އިއުލާނުކޮށްފިއެވެ.

ބުރާސްފަތި ދުވަހު ސިޓީ ކައުންސިލުން ކުރި އިއުލާނުގައި ބުނެފައި ވަނީ، މާލެ ސިޓީގައި އެއްގަމު އުޅަނދު ރަޖިސްޓަރީ ކޮށްދޭނެ އަދަދާއި، އުޅަނދު ބޭނުންކުރެވޭނެ މުއްދަތު ކަނޑައެޅުމަށްޓަކައި ސަރވޭ ކުރުމާއި މިކަމާގުޅޭ ސްޓަޑީއެއް ހެދުމަށް ބޭނުންވާކަމަށާއި، އެމަސައްކަތްކޮށްދިނުމަށް ޝައުޤުވެރިވާ ފަރާތްތަކަށް ފުރުޞަތު ހުޅުވާލާފައިވާ ކަމަށެވެ. 

މާަލޭ ސިޓީކައުންސިލުން ވިދާޅުވީ، މި ސާރވޭގެ މަސައްކަތްތަކަށް ޝައުގުވެރިވަޑައިގަންނަވާ ފަރާތްތަކަށް މައުލޫމާތު ދިނުމުގެ ބައްދަލުވުން، 18 ޖުލައި 2024 ވާ ބުރާސްފަތި ދުވަހުގެ 13:00 ގައި، ހ.ހުޅުގަލި 1ވަނަ ފަންގިފިލާގައި އޮންނާނެ ކަމަށެވެ. އަދި މިމަސައްކަތާއި ގުޅޭ ގޮތުން އިތުރު މައުލޫމާތު ސާފުކުރަން ބޭނުންވާ ފަރާތްތަކުން،  16ޖުލައި 2024 ވާ އަންގާރަ ދުވަހުގެ މެންދުރު 12:00ގެ ކުރިން [email protected] އަށް އީމެއިލްއިން ހުށައެޅުއްވުމުން އެމައުލޫމާތެއް ފޯރުކޮށްދޭނެ ކަމުގައިވެސް ސިޓީކައުންސިލުން ވަނީ ވިދާޅުވެފައެވެ.

މާލޭގައި އިންޖީނުލީ އެއްގަމު އުޅަނދު ފަހަރު ގިނަވުމުގެ މައްސަލައަކީ، އެކަމަށް ހައްލެއް ނުހޯދި ވަރަށް ގިނަ ދުވަސްތަކެއް ވެފައިވާ މައްސަލައެކެވެ. މާލޭގައި ވެހިކަލްތައް ގިނަ ތޮއްޖެހުމުގެ މައްސަލަ ބޮޑުވެފައި ވީނަމަވެސް، މާލޭގައި އެއްގަމު އުޅަނދުފަހަރު އިތުރުވުން ކޮންޓްރޯލް ކުރުމަށް އެކަށީގެންވާ މަސައްކަތްތަކެއް ކުރެވިފައެއް ނުވެއެވެ.