ސަރުކާރުގެ ޚަރަދުތައް ކުޑަކުރުމުގެ ގޮތުން ފިޔަވަޅުތަކެއް އެޅުއްވުމަށް ރައީސުލްޖުމްހޫރިއްޔާ ނިންމަވާފައިވާތީ، ލޯކަލް ކައުންސިލްތަކުންވެސް ކޮންމެހެން ކުރަންޖެހޭ ޚަރަދުތައް ފިޔަވައި އެހެން ޚަރަދުތައް ނުކުރެއްވުމަށް، ލޯކަލް ގަވަމެންޓް މިނިސްޓަރު އާދަމް ޝަރީފް ޢުމަރު ކައުންސިލް އިދާރާތަކަށް އަންގަވައިފިއެވެ.

އެ މިނިސްޓްރީން އެކަން އަންގައި ނެރުއްވި ސާކިއުލާގައި ވަނީ، ކައުންސިލްތަކުގެ ރިކަރެންޓް ޚަރަދުތައް ކުޑަކުރެއްވުމަށްވެސް އަންގަވާފައެވެ. މިގޮތުން، މިވަގުތު ކޮންމެހެން ކުރައްވަންޖެހޭ ހަރަދުތައް ނޫނީ ނުކުރެއްވުމަށާއި ކޮންމެހެން ކުރައްވަންޖެހޭ ދަތުރުތައް ނޫނީ ނުކުރެއްވުމަށާއި މުނާސަބަތަކާ ގުޅިގެން ކޮންމެހެން ބާއްވަންޖެހޭ ޖަލްސާއެއް ފިޔަވައި އެއްވެސް ހަރަކާތެއް ނުބޭއްވުމަށާއި އެއްވެސް ހަފުލާއެއް ނުވަތަ ކުޅިވަރު މުބާރާތެއް މިދުވަސްވަރު ނުބޭއްވުމަށް ޚާއްޞަ ސަމާލުކަމެއް ދިނުމަށްވެސް އެ ސަރކިއުލަރގައި މިނިސްޓްރީން ވަނީ ކައުންސިލްތަކަށް އަންގަވާފައެވެ.

ކައުންސިލްތަކުން ޚަރަދުތައް ކުޑަކުރެއްވުމަށް މިނިސްޓަރު އެންގެވި އިރު، އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މަޖިލީހުގެ ބައެއް މެމްބަރުން ވަނީ ކައުންސިލްތަކުގެ މުހިއްމު ނޫން ޚަރަދުތައް ކުރަމުންދާކަން ފާހަގަކުރައްވާފައެވެ. މަޖިލީހުގެ ނައިބުރައީސް އަޙްމަދު ނާޒިމްވެސް ބައެއް ކައުންސިލްތަކުން ކުރުމަށް ރާވާފައިވާ މުހިއްމު ނޫން ބައެއް ދަތުރުތަކާއި ކަންކަމާއި ގުޅޭ ވާހަކަތައް ހާމަކުރެއްވިއެވެ.

އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން ކައުންސިލްތަކަށް ދައުލަތުގެ ބަޖެޓުން ފައިސާ ދެއެވެ. އެފައިސާއިން އެއްބައި ކައުންސިލްތަކަށް ނުފުދޭއިރު، ބައެއް މަދު ކައުންސިލްތަކަކީ، އެކައުންސިލްތަކަށް ވަރަށް ގިނަ އާމްދަނީ ލިބޭ ކައުންސިލްތަކެވެ.

ސަރުކާރުން ޚަރަދު ކުޑަކުރެއްވުމަށް އެޅުއްވި ފިޔަވަޅުތަކުގެ ތެރެއިން، މިނިވަން ދުވަހުގެ ހަރަކާތްތައްވެސް މިއަހަރު ނުބާއްވަވާ ގޮތަށް ވަނީ ހަމަޖައްސަވާފައެވެ.