ކުރިއަށް އޮތް ދުވަސްތަކުގައި، ތިޔަ ކުދިންނަށް އަދި އޭލެވެލްއަށް ކިޔަވަން ބޭނުންވާ ހުރިހާ ކުދިންނަށް މާލޭގައާއި އަދި ރާއްޖޭގެ އެކި ކަންކޮޅު ތަކުގައި ވަރަށް ގިނަ ފުރުޞަތުތައް އިތުރުކޮށްދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ސީ.އެޗް.އެސް.އީ.އަށް 45 އަހަރު ފުރުމާ ގުޅިގެން ބޭއްވެވި ޚާއްޞަ އެސެމްބްލީގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، މާލޭގައިވެސް މިއަހަރާއި މިއަންނަ އަހަރު އޭލެވެލްއަށް ކިޔަވާ ކުދިންނަށް ފުރުޞަތުތައް ފުޅާކޮށްދެއްވާނެ ކަމަށެވެ. މިގޮތުން އެމަނިކުފާނުގެ ވާހަކަފުޅުގައި އިޝާރަތް ކުރައްވާފައިވަނީ، މާލޭގައި އަލުން ސަރުކާރުން އޭލެވެލްއަށް ކިޔަވައިދޭ ސްކޫލެއް ހިންގުމަށް ނިންމަވައި، މިނިސްޓަރ އޮފް އެޑިޔުކޭޝަން އެކަމާއި ގުޅޭ ގޮތުން ދައްކަވާފައިވާ ވާހަކަފުޅަށެވެ.

Advertisement

މީގެ އިތުރުން ރައީސް ވިދާޅުވީ، އޭލެވެލްއަށް ކިޔެވުމަށް އޮތް ފުރުޞަތުތައް ރާއްޖޭގެ ހުރިހާ އަތޮޅެއްގައިވެސް ފުޅާކުރައްވައި، ރަނގަޅު ޓީޗަރުން ބިނާކުރަން މަސައްކަތް ކުރައްވާނެ ކަމަށެވެ. އަދި ގެދޮރުގެ ފުރުޞަތު އިރާދަ ކުރެއްވިއްޔާ ތިޔަ ހުރިހާ ކުދިންނާއި ބެލެނިވެރިންނަށް ލިބޭނެގޮތް ފަހިކުރުމުގެ މަސައްކަތް ފައްޓަވާފައިވާ ކަމުގައިވެސް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، ހުޅުވައިލެވޭ ފުރުޞަތުތަކުގެ ބޭނުން ހިފުމަށް ކުދިން ތައްޔާރުވުމަށް އެދިވަޑައިގަންނަވާ ކަމަށެވެ. އަދި އަމިއްލަ ނަފުސު ދެކެ އިތުބާރުކޮށް، ގަދައަޅައި މަސައްކަތްކޮށް، ކެތްތެރިކަމާ އެކީގައި، ނުގުޑާފަދަ ޢަޒުމެއްގައި މަސައްކަތް ކުރުމަށްވެސް އެމަނިކުފާނު އެދިވަޑައިގެންނެވިއެވެ.

ކުރީގެ ސައިންސް އެޑިޔުކޭޝަން ސެންޓަރު އަދި މިހާރުގެ ސެންޓަރ ފޯރ ހަޔަރ ސެކަންޑަރީ އެޑިޔުކޭޝަން އަކީ، ރާއްޖޭގައި އެންމެ ފުރަތަމަ އޭލެވެލްއަށް ކިޔަވައިދޭންފެށި ސްކޫލެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް މަތީޘާނަވީއަށް ކިޔަވައި ވިދާޅުވެ އޭލެވެލް އިމްތިހާނު ހެއްދެވީ އެސްކޫލުގެ ދަރުވަރެއްގެ ގޮތުގައެވެ.