އިޓަލީ އަސްކަރިއްޔާގެ، އަސްކަރީ ހަނގުރާމަތީ މަތިންދާބޯޓުތަކަކާއި، އެބޯޓުތަކަށް އެހީތެރިކަން ފޯރުކޮށްދޭ އަސްކަރީ މަތިންދާ ބޯޓެއް މިއަދު މެންދުރުފަހު ވެލާނާ އިންޓަނޭޝަނަލް އެއާޕޯޓުގައި ޖައްސައިފިއެވެ.

ވެލާނާ އިންޓަރނޭޝަނަލް އެއާޕޯޓުގައި ޖައްސާފައި ވަނީ، ހަނގުރާމަމަތީ ހަތަރު މަތިންދާބޯޓާއި، އެ ބޯޓުތަކަށް އެހީތެރިކަން ފޯރުކޮށްދިނުމަށް އެކުގައި ދަތުރުކުރާ އަސްކަރީ އެހެން މަތިންދާބޯޓެވެ.

އެމްއެންޑީއެފުން ވިދާޅުވީ، ވެލާނާ އެއާޕޯޓުގައި އިޓަލީގެ އަސްކަރިއްޔާގެ ހަނގުރާމަމަތީ ބޯޓުތައް ޖައްސާފައި ވަނީ، އެކަމަށްޓަކައި ކަމާއި ބެހޭ އިދާރާތަކުން ނަގަންޖެހޭ ހުއްދަތައް ނަގައިގެން ކަމަށެވެ.

Advertisement

މިދިޔަ އަހަރުވެސް އިޓަލީ އަސްކަރިއްޔާގެ ހަނގުރާމަމަތީ މަތިންދާ ބޯޓުތައް ދެފަހަރެއްގެ މަތިން ވެލާނާ އިންޓަރނޭޝަނަލް އެއާޕޯޓުގައި ޖައްސާފައިވެއެވެ.

މިއަދު އެ ބޯޓުތައް ވެލާނާ އެއާޕޯޓަށް ޖެއްސި އިރު، މާލެއާ ހުޅުމާާލެއަށް ވަރަށް ބާރަށް އެބޯޓުތަކުގެ އިންޖީނުގެ އަޑު އިވުނު އެކަމާއި ގުޅިގެން ބައެއް މީހުން ސޯޝަލްމީޑިއާގައި ޝުއޫރުތައް ފާޅުކޮށްފައިވެއެވެ.

އިޓަލީ އަސްކަރިއްޔާގެ ހަނގުރާމަ މަތީ މަތިންދާ ބޯޓުތައް އަދި ރާއްޖެއިން ނުފުރައެވެ.