ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް, އެމަނިކުފާނުގެ ސަރުކާރުގެ ސްޓޭޓް މިނިސްޓަރެއްގެ މަޤާމުގައި ހުންނެވި، ފާޠިމަތު ޝަމްނާޒް ޢަލީ ސަލީމް ސިހުރު ހަދާފައިވާ ކަމަށް ބުނެ، ރާއްޖެއާ ބައިނަލް އަޤުވާމީ މީޑިއާގައި އެޚަބަރުތައް ފެތުރި، ރައީސުލްޖުމްހޫރިއްޔާހެ ޤަދަރާއި ކަރާމާތަށް އުނިކަން އަންނަ އެތައް ވާހަކަތަކެއް ފެތުރުނު ފަހުން، އެކަމާއި ގުޅޭ ގޮތުން ދެކެވުނު ބައެއް ވާހަކަތައް ރައީސުލްޖުމްހޫރިއްޔާގެ އޮފީހުން ދޮގު ކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުގެ ސީނިއަރ ސްޕޯކްސް ޕަރސަން ހީނާ ވަލީދު، އެކްސްގައި ކުރެއްވި ޕޯސްޓެއްގައި ވިދާޅުވީ، ސިޙުރުގެ މައްސަލަ އާއި ގުޅުވައި، ރައީސުލްޖުމްހޫރިއްޔާ އާއި އެމަނިކުފާނުގެ ޢާއިލާއަށް ނިސްބަތްކޮށް މީޑިއާގައި ފަތުރަމުން ދަނީ ހަގީގަތާ ޚިލާފު ދޮގު ޚަބަރުތަކެއް ކަމަށެވެ. ރައީސުލްޖުމްހޫރިއްޔާއާއި އެމަނިކުފާނުގެ ޢާއިލާއިން މިފަދަ އެއްވެސް މައްސަލައެއް އެއްވެސް ފަރާތަކާއިމެދު ފުލުހުންގެ އިދާރާއަށް ހުށަހަޅާފައި ނުވާކަމުގައިވެސް ހީނާ ވިދާޅުވިއެވެ.

މިމައްސަލައިގައި ފުލުހުންގެ ސްޕޯކްސް ޕަރސަން، އަޙްމަދު ޝިފާން ވިދާޅުވީ، ދިވެހި ފުލުހުންގެ ޚިދުމަތުން ތަޙްޤީގުކުރަމުން ގެންދާ، ހ. މެލްބަން، ފާޠިމަތު ޝަމްނާޒް ޢަލީ ސަލީމްއާއި އިތުރު ބަޔަކު ބައިވެރިވެގެން ސިހުރު ހަދާކަމަށް ތުހުމަތުކުރެވޭ މައްސަލައަކީ ދިވެހިރާއްޖޭގެ ރައީސުލްޖުމްހޫރިޔާއާއި އެމަނިކުފާނުގެ އާއިލާއިން ހުށަހަޅައިގެން ތަޙުޤީގުކުރަމުންދާ މައްސަލައެއްކަމަށް އާންމު މީޑިއާ އާއި ސޯޝަލް މީޑިއާގައި ދެކެވެމުންދާ ވާހަކަ ތަކަކީ އެއްވެސް އަސާސެއްނެތް، ދޮގު ވާހަކަ ތަކެއް ކަމަށެވެ.

Advertisement

މީގެ އިތުރުން، ޝަމްނާޒާއި އިތުރު ދެމީހަކު ހައްޔަރު ކުރީ، ރައީސުލްޖުމްހޫރިއްޔާއަށް ސިޙްރު ހަދާފައިވާ ކަމުގެ ތުހުމަތުގައި ކަމަށް ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި، އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވިއެވެ.

ސިހުރުގެ މިމައްސަލަ ފުލުހުން ބަލަމުން ގެންދަނީ، ފުލުހުންގެ އަމިއްލަ އިސްނެގުމެއްގައި ކަމެއް ނުވަތަ އެއްވެސް ފަރާތަކުން ރިޕޯޓްކޮށްގެން ކަމެއް މިހާތަނަށް ފުލުހުން ހާމަކުރައްވާފައެއް ނުވެއެވެ. އަދި މައްސަލަ އާއި ގުޅޭ އިތުރު ތަފްޞީލެއްވެސް ފުލުހުން ހާމައެއް ނުކުރައްވައެވެ.

ރައީސުލްޖުމްހޫރިއްޔާގެ ކަރާމާތާއި އަބުރުފުޅަށް ހުތުރުވާގޮތަށް ސިޙްރުގެ މިމައްސަލަ އާއި ގުޅޭ ގޮތުން ރާއްޖޭގެ މީޑިއާ އާއި ބައިނަލްއަޤުވާމީ މީޑިއާތަކުގައި ޚަބަރުތައް ފެތުރި ސޯޝަލްމީޑިއާގެ އެކި މަންސަތަކުގައި ރައީސުލްޖުމްހޫރިއްޔާއަށް ބައެއް ފަރާތްތަކުން ދަނީ ފުރައްސާރަވެސް ކުރަމުންނެވެ. ރައީސުލްޖުމްހޫރިއްޔާއަށް ސިޙުރު ހަދާފައިވާ ކަމަށް ބުނާ ޚަބަރު، އަލްޖަޒީރާ އާއި އާރްޓީ، އޭއެފްޕީއާ ވިއޯން، ސްކައިނިއުސް އަދި ގްލޯބަލްއައި ފަދަ ދުނިޔޭގެ ބޮޑެތި މީޑިއާތަކުން ވަނީ ގެނެސްދީފައެވެ. މީގެ އިތުރުން މެދުއިރުމަތީގައި ޢަރަބިބަހުން ޚަބަރުތައް ގެނެސްދޭ މީޑިއާތަކުންވެސް ވަނީ މިޚަބަރު ކަވަރުކޮށްފައެވެ.

ފާޠިމަތު ޝަމްނާޒް ޢަލީ ސަލީމްއާއި އިތުރު ބަޔަކު ބައިވެރިވެގެން ސިހުރު ހަދާފައިވާ ކަމަށް ތުހުމަތު ކުރެވުނު މައްސަލައިގައި ޝަމްނާޒާއި އޭނާގެ ކޮއްކޮގެ ބަންދުގެ މުއްދަތު އިއްޔެ ވަނީ ދެވަނަ ފަހަރަށް ކޯޓުން އިތުރުކޮށްދީފައެވެ. މިގޮތުން އެދެ މީހުން އިތުރު 7 ދުވަހަށް ބަންދުކުރުމަށް ކޯޓުން އަމުރުދީފައި ވާއިރު، ސިޙްރު ހަދައިދިން ކަމުގެ ތުހުމަތުގައި ހައްޔަރު ކުރި 58 އަހަރުގެ ދިވެހި ފިރިހެންމީހާ، ޝަރުޠުތަކާއި އެކު ހުޅުމާލެ މެޖިސްޓްރޭޓް ކޯޓުން ހޮނިހިރު ދުވަހު އެމީހާ ވަނީ ބަންދުން ދޫކޮށްލާފައެވެ.