އަންހެނެއްގެ ބޮލުގައި ގާބުރިއަކުން ޖެހިކަމުގެ ތުހުމަތުގައި ހައްޔަރުކުރި, ސަރުކާރަށް ސޯޝަލް މީޑިއާގައި ފާޑު ކިޔަމުން އަންނަ ސޯޝަލްމީޑިއާ އެކްޓިވިސްޓް، އަދި މަސްވެރިޔާ ޢަލީ ސާޖިދުގެ ބަންދަށް 7 ދުވަސް ޖަހައިފިއެވެ.

ފުލުހުންގެ އިދާރާއިން ވިދާޅުވީ، ގއ. ވިލިގިލީގައި އަންހެނެއްގެ ބޮލުގައި ގާބުރިއަކުން ޖެހުމުގެ ތުހުމަތުގައި ހައްޔަރުކޮށްފައިވާ، އުމުރުން 32 އަހަރުގެ ދިވެހި ފިރިހެން މީހާގެ ބަންދާއި މެދު ގޮތެއް ނިންމުމަށް، ވިލިގިލީ މެޖިސްޓްރޭޓް ކޯޓަށް ހާޟިރު ކުރުމުން އޭނާގެ ބަންދަށް ކޯޓުން 7 ދުވަސް ޖަހައިދީފައިވާ ކަމަށެވެ. 

ފުލުހުންގެ އިދާރާއިން ވިދާޅުވެފައިވާ ގޮތުގައި އަނިޔާ ލިބުނު މީހާއަކީ އުމުރުން 46 އަހަރުގެ އަންހެނެކެވެ. އޭނާއަށް ވިލިގިލީގައި ހުންނަ، ގއ. އަތޮޅު ހޮސްޕިޓަލްގައި ފަރުވާ ދިނުމަށް ފަހު، ހަމަ އެރޭ ވަނީ ދޫކޮށްލާފައެވެ. މި މާރާމާރީ ހިނގާފައި ވަނީ، ޖޫން 29 ވަނަ ދުވަހުގެ ރޭގައެވެ.

Advertisement

މިމައްސަލައިގައި ހައްޔަރު ކުރި މީހާއަކީ، ސަރުކާރަށް ސޯޝަލް މީޑިއާގައި ފާޑު ކިޔަމުން އަންނަ ސޯޝަލްމީޑިއާ އެކްޓިވިސްޓް، އަދި މަސްވެރިޔާ ޢަލީ ސާޖިދުކަމުގައި ފުލުހުން ހާމަކޮށްފައި ނުވި ނަމަވެސް، ތުހުމަތުގައި ހައްޔަރު ކުރި މީހާއަކީ، ޢަލީ ސާޖިދުކަން އެހެން މަސްދަރުތަކުން ވަނީ ޔަޤީން ކުރެވިފައެވެ.