މާދަމާއި ފެށިގެން ޢަމަލު ކުރަން ނިންމާފައިވާ ދިވެހި ފުލުހުންގެ އައު އޮނިގަނޑުގެ ދަށުން، ހުޅުމާލެ ޕޮލިހަކީ ވަކި ކޮމާންޑެއްގެ ގޮތުގައި ހަމަޖައްސައިފިއެވެ.

ދިވެހި ފުލުހުންގެ ޚިދުމަތުން ހާމަކޮށްފައިވާ ގޮތުގައި ކުރިޔަށް އޮތް 4 އަހަރަށް އެކުލަވާލާފައިވާ، ދިވެހި ފުލުހުންގެ ޚިދުމަތުގެ ސްޓްރެޓެޖިކް ޕްލޭންގެ ދަށުން، ފުލުހުންގެ ޚިދުމަތުގެ ހިންގުމަށް ގެނެވޭ ބަދަލުތަކުގެ ތެރެއިން، ހުޅުމާލެ ޕޮލިސް މާދަމާއިން ފެށިގެން ހިނގަމުންދާނީ ވަކި ކޮމާންޑެއްގެ ގޮތުގައެވެ.

ފުލުހުންގެ ޚިދުމަތުން ހާމަކޮށްފައިވާ ގޮތުގައި، ހުޅުމާލެ ޕޮލިސް ވަކި ކޮމާންޑެއްގެ ގޮތުގައި ހަމަޖެއްސީ. ހުޅުމާލޭގައި ކުރެވޭ ޕޮލިސިން އިތުރަށް ހަރުދަނާކޮށް ތަނާ އެކަށީގެންވާ ޕޮލިސިންގ ޚިދުމަތެއް ދިނުމަށްޓަކައެވެ.

ގްރޭޓާމާލެ ސަރަހައްދުގައި މިހާރު އެންމެ ބޮޑު އާބާދީއެއް ދިރިއުޅެމުން އަންނަނީ ހުޅުމާލޭގައެވެ. ހުޅުމާލެ ފޭސް 1 އާއި ފޭސް 2ގައި ފުލުހުންގެ ޕޯސްޓްތައް ޤާއިމްކޮށް މިހާރުވެސް އަންނަނީ ޚިދުމަތް ދެމުންނެވެ.