ކުރިއަށް އޮތް 4 އަހަރު ދުވަހަށް އެކުލަވާލާފައިވާ، ދިވެހި ފުލުހުންގެ ޚިދުމަތުގެ ސްޓެރެޓެޖިކް ޕްލޭނަށް މާދަމާއިން ފެށިގެން ޢަމަލުކުރުމަށް ނިންމާފައިވާ ކަމުގައި ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ދިވެހި ފުލުހުންގެ ޚިދުމަތުން، ފުލުހުންގެ ތަރުޖަމާނު، އަޙްމަދު ޝިފާން މީޑިއާތަކަށް ޙިއްޞާކުރެއްވި މަޢުލޫމާތުގައި ވަނީ، މާދަމާއި ފެށިގެން ދިވެހި ފުލުހުންގެ ޚިދުމަތަށް ގެނެވޭ ބައެއް ބަދަލުތައް ހާމަކުރައްވާފައެވެ.

މިގޮތުން ގެނެވޭ ބަދަލުތަކުގެ މައިގަނޑު ބޭނުމަކީ، ދިވެހި ފުލުހުންގެ ޚިދުމަތުގެ ސްޓްރެޓެޖިކް ޕްލޭން ތަންފީޒް ކުރުމަށް މަސައްކަތްތައް ތަރުތީބު ކުރުން ކަމަށާއި، މިގޮތުން އައު ސްޓްރެޓެޖިކް ޕްލޭންގެ ދަށުން މިހާރު ވަނީ، ލޯކަލް ޕޮލިސިންގ ރީޖަންތައް ހިމަނައިގެން ކޮމާންޑް އަދި ޑައިރެކްޓްރޭޓްތައް 17އަށް އިތުރު ކުރެވިފައި ވާކަމުގައި ޝިފާން ވިދާޅުވިއެވެ.

އަލަށް އުފެއްދި ކޮމާންޑް ތަކަކީ، ގޭންގް ކްރައިމް އެންފޯސްމެންޓް، ޑިޖިޓަލް ޑާޓާ އެންޑް ޓެކްނޮލޮޖީ، އަދު ހުޅުމާލެ ޕޮލިސް އެވެ. އަދި މިތަންތަނުގެ އިތުރުން، ޢިލްމާއި ތަމްރީނާއި ގުޅޭ ގޮތުން، ކޮމާންޑް، ޑައިރެކްޓްރޭޓް އަދި ޑިޕާޓްމަންޓްތަކަށްވެސް ވެރިން ޢައްޔަނުކުރެވިފައިވާ ކަމުގައި ޝިފާން ވިދާޅުވިއެވެ.

ޝިފާން ވިދާޅުވީ، މިގެނެވުނު ބަދަލުތަކުގެ މަޤުޞަދުތަކުގެ ތެރޭގައި، ދިވެހި ފުލުހުންގެ ޚިދުމަތުގެ ހިންގުން ހަރުދަނާކުރުމާއި، ޚިދުމަތްތައް ތަރުތީބުކުރުން ކުރުން ހިމެނޭނެ ކަމަށެވެ. އަދި އަވަސް، ޢިތުބާރު ކުރެވޭ ޚިދުމަތުގެ ނިޒާމެއް އެކަށައެޅުމަކީވެސް މި 4 އަހަރުގެ ޕްލޭނުގައި އަމާޒު ހިފާފައިވާ މުހިއްމު ދާއިރާއެއް ކަމުގައި އޭނާ ވިދާޅުވިއެވެ.

ދިވެހި ފުލުހުންގެ ޚިދުމަތާއި ހިންގުމުގެ އޮނިގަނޑަށް ބޮޑު ބަދަލެއް މާދަމާއިން ފެށިގެން ގެންނައިރު، މަތީ ފަންތީގެ ފުލުސް އޮފިސަރުން ހިމެނޭހެން، ގިނަ އޮފިސަރުންތަކެއްގެ މަޤާމާއި މަސްޢޫލިއްޔަތާއި ޒިންމާތަކަށް ބަދަލުތައް ގެނެސްފައިވެއެވެ. އެހެން ނަމަވެސް މަޤާމާއި މަސްޢޫލިއްޔަތުގެ ޒިންމާތައް ބަދަލުކުރެވުނު އޮފިސަރުންނާއި އެ އޮފިސަރުންނާއި އަލަށް ހަވާލުވި ޒިންމާތަކުގެ މަޢުލޫމާތެއް ދިވެހި ފުލުހުންގެ ޚިދުމަތުން އަދި ހާމައެއް ނުކުރެއެވެ.