ފައިސާއަށް މަސްތުވާތަކެއްޗާއި ފޯނުފަދަ މަނާތަކެތި ޖަލަށް ވައްދައިދިނުމުގެ ތުހުމަތުގައި ހައްޔަރު ކުރި ޖަލު އޮފިސަރުންގެ 11 މީހުން ޝަރީޢަތް ނިމެންދެން ބަންދުކޮށްފިއެވެ.

ފުލުހުންގެ އިދާރާއިން ބުނީ، އެމައްސަލައިގައި މިހާތަނަށް 13 މީހުން ހައްޔަރުކޮށްފައިވާ ކަމަށާއި، އޭގެ ތެރެއިން 2 މީހެއް ފިޔަވައި އަނެއް 11 މީހުން ޝަރީއަތް ނިމެންދެން ބަންދު ކުރުމަށް ކޯޓުން އަމުރު ދީފައިވާ ކަމަށެވެ. އަނެއް ދެމީހުން ބަންދުގައި ބޭތިއްބުމަށް ކޯޓުން ދީފައި ވަނީ 5 ދުވަހުގެ މުއްދަތެއް ކަމުގައިވެސް ފުލުހުންގެ އިދާރާއިން ވަނީ ބުނެފައެވެ.

އިއްޔެ މާފުށީ ޖަލުގައި ފުލުހުން ހިންގި އޮޕަރޭޝަނުގައި ޖަލުން ބައެއް މީހުން ހައްޔަރުކުރި އިތުރު ދެމީހުން ހައްޔަރު ކުރީ، ކ. ކާށީދޫ އިންނެވެ.

Advertisement

ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރ ޢަލީ އިޙްޞާން ވިދާޅުވީ، ފައިސާއަށްް ޖަލަށް މަނާތަކެތި ވައްދައިދިން 18 އޮފިސަރަކު ފާހަގަވެފައިވާ ކަމަށެވެ. އޭގެ ތެރެެއިން 6 އޮފިސަރުންނަކީ، މިހާރު މޯލްޑިވްސް ކަރެކްޝަނަލް ސަރވިސްގެ ޚިދުމަތުން ވަކިވެފައިވާ އޮފިސަރުން ކަމުގައިވެސް މިނިސްޓަރ އިޙްސާން ވިދާޅުވިއެވެ.

މިނިސްޓަރ އިޙްޞާން ވިދާޅުވީ 2023 ވަނަ އަހަރުން ފެށިގެން، އެ 18 އޮފިސަރުންގެ ބޭންކް އެކައުންޓަށް 73.3 މިލިޔަން ރުފިޔާ ޖަމާވެފައިވާ ކަމަށެވެ. އަދި އެއް އޮފިސަރެއްގެ އެކައުންޓަށް 24 މިލިޔަން ރުފިޔާ ޖަމާވެފައި ހުރިކަމުގައިވެސް މިނިސްޓަރ ވިދާޅުވިއެވެ.