ހައްދުންމަތީ ދަނބިދޫގައި އުމުރުން ދުވަސްވީ އަންހެނަކު މޫދުތެރޭގައި މަރުވެފައި އޮއްވައި ފެނިއްޖެއެވެ.

ފުލުހުންގެ އިދާރާއިން ބުނީ، މަރުވެފައި އޮއްވައި ފެނުނީ، އެރަށު ނިޔަދުރުމާގޭ އައިމިނަތު އުމަރު (65އ) ކަމަށެވެ.

ފުލުހުންގެ އިދާރާއިން ބުނީ އެހާދިސާ ފުލުހުންނަށް ރިޕޯޓްކޮށްފައި ވަނީ މިއަދު ހަވީރު 16:55 ހާއިރުގައި ކަމަށާއި، އަންހެން މީހާ ފެނިފައި ވަނީ ދަނބިދޫ އިރުމަތީ ފަރާތުން ކޯޒްވޭ ސަރަހައްދުން މޫދުތެރެއިން އޮޔާ ދަނިކޮށް ކަމަށެވެ. އަދި އެއަންހެންމީހާ ދަނބިދޫ ޞިއްޙީ މަރުކަޒަށް ގެންދިޔައިރުވެސް ނިޔާވެފައިވާ ކަމަށް، ޞިއްޙީމަރުކަޒާއި ހަވާލާދީ ފުލުހުން ބުނެފައިވެއެވެ.

ފުލުހުންގެ އިދާރާއިން ބުނީ، މަރުގެ މިހާދިސާ އާއި ގުޅިގެން ބަލަންޖެހޭ ކަންކަން އެއިދާރާއިން ބަލަމުން ގެންދާ ކަމަށެވެ.