ކޮންމެހެން ބޭނުންވާ ޙާލަތްތަކުގައި މެނުވީ އައިޖީއެމްއެޗަށް ޒިޔާރަތް ނުކުރުމަށާއި، ހޮސްޕިޓަލަށް ޒިޔާރަތްކުރާއިރުވެސް މާސްކު އެޅުމަށް އިންދިރާގާނދީ މެމޯރިއަލް ހޮސްޕިޓަލުން އެދިއްޖެއެވެ.

އެހޮސްޕިޓަލުން މިކަމަށް އެދުނީ، ހައްޖު ކްލިނިކަށް ހާޟިރުވާ މީހުންގެ ތެރޭގައި ރޯގާގެ ޢަލާމާތަތްތައް ހުންނަ މީހުންގެ އަދަދު އިތުރުވުމާއި ގުޅިގެން ކަމުގައި ހޮސްޕިޓަލުން ވަނީ ބުނެފައެވެ. އެހޮސްޕިޓަލުން މިއަދު ނެރުނު ދެންނެވުމުގައި ބުނެފައި ވަނީ، ހައްޖު ކްލިނިކަށް ޒިޔާރަތް ކުރާ މީހުންގެތެރެއިން ރޯގާގެ ޢަކާމާތްތައް ހުންނަ މީހުންގެ އަދުސު އިތުރުވުމާއި ގުޅިގެން، ބަލިމީހުންނާއި މުވައްޒަފުންނާއި މުޖުތަމަޢުގެ ރައްކާތެރިކަން އިތުރު ކުރުމުގެ ގޮތުން ބައެއް ފިޔަވަޅުތައް އެޅުމަށް ހޮސްޕިޓަލުން ނިންމާފައިވާ ކަމަށެވެ.

މިގޮތުން، ކޮންމެހެން ބޭނުންވާ ޙާލަތްތަކުގައި މެނުވީ ހޮސްޕިޓަލަށް ޒިޔާރަތް ނުކުރުމަށާއި، ޒިޔާރަތްކުރައްވާއިރު މާސްކު އެޅުމަށާއި، ޚާއްޞަކޮށް ރޯގާގެ އެއްވެސް އަލާމާތެއް ހުރިނަމަ އެކަމަށް ސަމާލުވެވަޑައިގެން މާސްކު އަޅުއްވައިގެން ވަޑައިގެންނެވުމަށާއި، ހޮސްޕިޓަލުގެ ތެރޭގައި ގިނަ މީހުން އެއްވެ އުޅުމުން ދުރުހެލިވުމަށް އައިޖީއެމްއެޗްއިން ވަނީ އާއްމުންނަށް އިލްތިމާސްކޮށްފައެވެ.

މިއަހަރު ރާއްޖެއިން ހައްޖަށް ދިޔަ މީހުންގެ ތެރެއިން މީހަކަށް، ބެކްޓީރިއާއަކުން ޖެހޭ ނުރައްކާތެރި ބައްޔެއް ކަމަށްވާ، އިންވޭސިވް މެނިންގޯކޮކަލް ޖެހިގެން ވަނީ ނިޔާވެފައެވެ. މި ބައްޔަކީ، އާދައިގެ ރޯގާއެއް ފަދައި ފުރަތަމަ އަލާމާތްތައް ފެނުނު ނަމަވެސް މަދު ގަޑިއިރުތަކެއްގެ ތެރޭގައި މީހާގެ ފުރާނައަށް ނުރައްކާވެގެންދާ ބައްޔެކެވެ. ހައްޖަށް ގޮސްފައި އައި މީހުންގެ ތެރެއިން މިބަލި ފެނުމާއި ގުޅިގެން އެޗްޕީއޭއިން ވަނީ ކޮންޓެކްޓް ޓްރޭސިންގ ހަދައި ބަލި ކޮންޓްރޯލް ކުރުމުގެ މަސައްކަތް ފަށާފައެވެ.