މާފުށީ ޖަލަށް މަސްތުވާތަކެއްޗާއި ފޯނު ފަދަ ޖަލަށް ވެއްދުން މަނާތަކެތި ވައްދައިދިނުމުގެ ކުށުގެ ތުހުމަތުގައި މިހާތަނަށް 8 އޮފިސަރަކު ހައްޔަރުކޮށްފިއެވެ.

ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރ ޢަލީ އިޙްޞާން ވިދާޅުވީ، ފައިސާއަށްް ޖަލަށް މަނާތަކެތި ވައްދައިދިން 18 އޮފިސަރަކު ފާހަގަވެފައިވާ ކަމަށެވެ. އޭގެ ތެރެެއިން 6 އޮފިސަރުންނަކީ، މިހާރު މޯލްޑިވްސް ކަރެކްޝަނަލް ސަރވިސްގެ ޚިދުމަތުން ވަކިވެފައިވާ އޮފިސަރުން ކަމުގައިވެސް މިނިސްޓަރ އިޙްސާން ވިދާޅުވިއެވެ.

މިނިސްޓަރ އިޙްޞާން ވިދާޅުވީ 2023 ވަނަ އަހަރުން ފެށިގެން، އެ 18 އޮފިސަރުންގެ ބޭންކް އެކައުންޓަށް 73.3 މިލިޔަން ރުފިޔާ ޖަމާވެފައިވާ ކަމަށެވެ. އަދި އެއް އޮފިސަރެއްގެ އެކައުންޓަށް 24 މިލިޔަން ރުފިޔާ ޖަމާވެފައި ހުރިކަމުގައިވެސް މިނިސްޓަރ ވިދާޅުވިއެވެ.

މިނިސްޓަރ އިޙްސާން ވިދާޅުވީ، އެ އޮފިސަރުންނަކީ، އެހެން ވިޔަފާރިއެއް ނުވަތަ އާމްދަނީ ހޯދުމަށް އެހެން މަސައްކަތެއް ކުރާ ބައެއްކަން ފާހަގަވެފައި ނެތް ކަމަށެވެ. އަދި ޖަލު ބަލަހައްޓަމުން ދިޔަ އެ އޮފިސަރުންނަށް މާލޭގައި ކުށުގެ މާހައުލުގައި އުޅޭ ފަރާތްތަކުންނާއި، ޖަލުގައި ތިބި މީހުންގެ އެކައުންޓްތަކުންވެސް ފައިސާ ޖަމާކޮށްފައިވާ ކަމުގައި މިނިސްޓަރ އިޙްސާން ވިދާޅުވިއެވެ.

ފައިސާގެ މިހާ ބޮޑެތި މުއާމަލާތްތަކެއް ހިނގައި ދިޔައިރު ބޭންކާއި އެމްއެމްއޭގެ ފައިނޭންޝަލް އިންޓެލިޖެންސަށް އެކަން ނޭގުނީ ކީއްވެތޯ ނޫން.އެމްވީ ކުރި ސުވާލަށް ޖަވާބު ދެއްވަމުން މިނިސްޓަރ އިހްސާން ވިދާޅުވީ، ޖަލު އޮފިސަރުންގެ އެކައުންޓްތަކަށް ފައިސާ ޖަމާކޮށްފައި ހުރީ 5000ރ ފަދަ ކުދި އަދަދު ތަކުން ކަމަށެވެ.

މިއީ މިހާރު މާފުށީ ޖަލުގައި ކުރިޔަށްދާ އޮޕަރޭޝަނަކަށްވާތީ، ތަޙްޤީޤު ކުރިޔަށްދާ މިންވަރަކުން އެކަމާއި ގުޅޭ މައުލޫމާތު ހިއްސާކުރައްވާނެ ކަމުގައި މިނިސްޓަރ އިޙްސާން ވިދާޅުވިއެވެ.