ލޭ ބޭނުންވާ ފަރާތްތަކަށް އެހީތެރިވުމުގެ ގޮތުން، ސްޓެލްކޯއިން ލޭ ހަދިޔާ ކުރުމުގެ ޕްރޮގްރާމެއް ހިންގައިފިއެވެ. ބުދަ ދުވަހު ސްޓެލްކޯއިން ހިންގި މި ހަރަކާތުގައި އެ ކުންފުނީގެ ސަތޭކައެއްހާ މުވައްޒަފުން ބައިވެރިވެފައިވެއެވެ.

އިޖުތިމާއީ ކަންކަމަށް އަބަދުވެސް އިސްކަމެއް ދޭ، ސްޓެލްކޯއިން ހިންގި މި ޕްރޮގްރާމު އަމާޒަކީ، ލޭ ބޭނުންވާ ފަރާތްތަކަށް ފަސޭހައިން ލޭ ލިބޭނެ އިންތިޒާމު ހަމަޖެއްސުމުގައި ހިއްސާވުންކަމަށް އެ ކުންފުނިން ވަނީ ހާމަކޮށްފައެވެ.

މި ހަރަކާތާ ގުޅިގެން ސްޓެލްކޯގެ މެނޭޖުމަންޓުން ފާހަގަކޮށްފައިވާ ގޮތުގައި، މުޖުތަމައަށް ލާބަ އާއި މަންފާކުރާ ތަފާތު އެކި ދާއިރާ ތަކުން އާންމު ރައްޔިތުންނަށް ޚިދުމަތް ކުރުމަކީ އެ ކުންފުނިން އަބަދުވެސް ކުރާނެ ކަމެއް ކަމަށާއި، އެއީ ކުންފުނީގެ މެނޭޖުމަންޓުން ވަރަށް އިސްކަމެއްދޭ ކަމެއް ކަމުގައެވެ.

މި ހަރަކާތް ހިންގާފައިވަނީ ސްޓެލްކޯއާއި މޯލްޑިވްސް ބްލަޑް ސާވިސަސް ގުޅިގެންނެވެ. އަދި ސްޓެލްކޯއިން ހާމަކޮށްފައިވާ ގޮތުގައި އެ ކުންފުނީގެ އަމާޒަކީ މި ޕްރޮގްރާމް ކޮންމެ އަހަރެއްގައި ވެސް ކުރިޔަށް ގެންދިއުމެވެ.

އެ ކުންފުނިން ވަނީ ފަލަސްޠީނުގެ ރައްޔިތުންނަށް އެހީވުމަށްޓަކައި ޤައުމީ ފެންވަރުގައި ބޭއްވި 'ފަލަސްޠީނާއެކު ދިވެހީން'  ޚާއްޞަ ޓެލެތޯނަށް ވެސް ބައި މިލިޔަން ރުފިޔާ ހަދިޔާކޮށްފިއެވެ.