ހިޔާ ފްލެޓްގައި މީހަކަށް އަނިޔާ ކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވާން ފެށުމާއި އެކު ފުލުހުން އެމައްސަލަ ބަލަން ފަށައިފިއެވެ.

ފުލުހުންގެ އިދާރާއިން ބުނީ، ހިޔާގެ ޓަވަރެއްގެ ކޮރިޑޯ ތެރޭގައި މީހަކަށް އަނިޔާ ކުރާ މަންޒަރު ފެންނަ ވީޑިއޯ، ޖޫން 19 ވަނަ ދުވަހު ފުލުހުންގެ ސަމާލުކަމަށް އައިސްފައިވާ ކަމަށެވެ. އަދި އެމައްސަލަ ފުލުހުން މިހާރު ތަޙްޤީޤު ކުރަމުންދާ ކަމަށާއި އެހެން ނަމަވެސް ވީޑިއޯއިން ފެންނަ މީހުން މިހާތަނަށް ދެނެގަނެވިފައި ނުވާތީ، އެވީޑިއޯގައި ފެންނަ މީހުންނާއި ގުޅޭ އެއްވެސް މައުލޫމާތެއް ލިބިފައިވާނަމަ އެމައުލޫމާތެއް ފުލުހުންނާއި ހިއްޞާކޮށްދިނުމަށް ފުލުހުންގެ އިދާރާއިން ވަނީ އާއްމުންގެ ކިބައިން އެދިފައެވެ.

ސޯޝަލް މީޑިއާ އާއި އެނޫންވެސް ގޮތް ގޮތުން، ދައުރުވާ ވީޑިއޯތަކުގައި ޖިނާޢީކުށްތަކަށް އަރައިގަތުމުގެ މައްސަަލަތައް ފާހަގަވެއްޖެނަމަ ފުލުހުން ގެންދަނީ އެކަންކަން ބަލައި ފިޔަވަޅު އަޅަމުންނެވެ. ދާދިފަހުން އއ އަތޮޅުގެ ރަށެއްގެ މިސްކިތެއްގެ ތެރޭގައި ކުޑަކުއްޖަކަށް އަނިޔާކުރާ މަންޒަރު ފެންނަ ވީޑިއޯ އެއް އާއްމުވެ ފުލުހުން އެމައްސަލަ ބަލާފައިވެއެވެ.