މިދިޔަ ހޮނިހިރު ދުވަހު ނ. އަތޮޅުގެ ފަޅުރަށަކަށް ލެއްގި ސޯމާލިއާގެ ޑިންގީގައި ތިބި މީހުން ހުޅުމާލެއަށް ގެނެސްފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

މިމަހުގެ 22 ވީ ހޮނިހިރު ދުވަހު، ނ. އަތޮޅުގައި އޮންނަ ވަވަތި ނަމަކަށް ކޔާ ފަޅުރަށަކަށް ލެއްގި ޑިންގީގައި ތިބީ ސޯމާލިއާގެ ތިން ފިރިހެނުންނެވެ. އެމީހުން ފެނުނު އިރު ހާލު ރަނގަޅެވެ.

ފުލުހުންގެ އިދާރާއިން ވިދާޅުވީ، އެމީހުން ފުލުހުންގެ ބެލުމުގެ ދަށުގައި، ނ. ހޮޅުދޫގައި ބޭތިއްބުމަށްފަހުގައި މިހާރު ހުޅުމާލެއަށް ގެނެސް އިމިގްރޭޝަނާއި ހަވާލުކޮށްފައިވާ ކަމަށެވެ. އެމީހުން މިވަގުތު ބައިތިއްބާފައި ތިބީ ހުޅުމާލޭގައި ހުންނަ އިމިގްރޭޝަންގެ ޑިޓެންޝަން ފެސިލިޓީގައެވެ.

Advertisement

ސޯމާލިއާގެ ޑިންގީގައި ރާއްޖެއަށް ލެއްގި މީހުންނަކީ، ކަނޑުމަތީގައި ކޮން މަސައްކަތެއް ކުރަން އުޅުނު ބައެއް ކަމެއް ނޭނގެއެވެ. އެހެން ނަމަވެސް ކުދި ޑިންގީތަކުގައި ސޯމާލިއާގެ މީހުން އިންޑިއާކަނޑުގެ ހުޅަނގު ސަރަހައްދުތަކަށް ނުކުމެ، އާގު ބޯޓު ފަހަރު ކަނޑުފޭރުމުގައި ހަރަކާތްތެރިވެއެވެ.

މީގެ ކުރިންވެސް އެތައް ފަހަރެއްގެ މަތިން ސޯމާލިއާގެ މީހުން ކުދި ޑިންގީތަކުގައި ރާއްޖެއަށް ލައްގާފައިވެއެވެ.