ރައީސުލްޖުމްހޫރިއްޔާ ސްޓޭޓް މިނިސްޓަރެއްގެ މަޤާމަށް ޢައްޔަނު ކުރައްވާފައިވާ، ފާތިމަތު ޝަމްނާޒް އަލީ ސަލީމާއި އިތުރު ދެމީހަކު ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ، ސްޓޭޓް މިނިސްޓަރ ފާތިމަތު ޝަމްނާޒް އަލީ ސަލީމާއި އޭނާއާއެކު ހައްޔަރުކުރި އަނެއް ދެމީހުންގެ ބަންދާއިމެދު ގޮތެއް ނިންމުމަށް ކޯޓަށް ހާޟިރުކުރުމުން އެތިން މީހުންގެ ބަންދަށް ކޯޓުން 7 ދުވަސް ޖަހައިދީފައިވާ ކަމަށެވެ.

ޝަމްނާޒް އާއި އިތުރު ދެމީހަކު ހައްޔަރުކުރީ ފުލުހުން ބަލަމުންދާ މައްސަލައަކާއި ގުޅިގެން ކަމުގައި ފުލުހުންގެ އިދާރާއިން ވިދާޅުވި ނަމަވެސް އެއީ ކޮން މައްސަލައެއްކަމެއް ފުލުހުންގެ އިދާރާއަކުން ހާމައެއް ނުކުރައްވައެވެ.

ޝަމްނާޒަކީ، ކުރިން ރައީސުލްޖުމްހޫރިއްޔާގެ ރަސްމީ ގެކޮޅު، މުލީއާގޭގެ ސްޓޭޓް މިނިސްޓަރެއްގެ ގޮތުގައިވެސް މަސައްކަތް ކުރައްވާފައިވާ ބޭކަނބަލެކެވެ. އަދި ފަހުން ރައީސް ޑރ. މުޙައްމަދު މުޢިއްޒު ވަނީ ޝަމްނާޒް އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރުގެ ގޮތުގައި އެމިނިސްޓްރީއަށް އޭނާގެ މަޤާމު ބަދަލުކުރައްވާފައެވެ. މީގެ އިތުރުން ޝަމްނާޒަކީ، ރައީސް ޑރ. މުހައްމަދު މުޢިއްޒާއި ގާތްގުޅުމެއް ބޭއްވި ރައީސް އޮފީހުގެ މިނިސްޓަރ އާދަމް ރަމީޒްގެ ކުރީގެ އަނބިކަނބަލުންނެވެ. އާދަމް ރަމީޒާއި ރައީސް ޑރ. މުޙައްމަދު މުޢިއްޒާއިވެސް މައްސަލަތަކެއް ޖެހި ދެބޭފުޅުން އެކުގައި ނުފެންނަތާ ގިނަ ދުވަސްތަކެއް ވަނީ ވެފައެވެ.

ބައެއް މީޑިއާތަކުން ރިޕޯޓްކޮށްފައިވާ ގޮތުގައި ޝަމްނާޒު ހައްޔަރުކޮށްފައި ވަނީ ސިހުރު ހެދުވުމުގެ ތުހުމަތުގައެވެ. އަދި އޭނާ ދިރިއުޅޭތަން ބަލައި ފާސްކޮށް ފުލުހުން ބައެއް އެއްޗެހި ގެންދިޔަކަމަށްވެސް މައުލޫމާތު ލިބިފައިވެއެވެ. 

މީޑިއާތަކުގައި ރިޕޯޓްކޮށްފައިވާ ގޮތުގައި، ޝަމްނާޒް ސިހުރު ހަދުވާފައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށެވެ. އަދި ޝަމްނާޒް ސިހުރު ހެދުވީ، އޭނާގެ ކުރީގެ ފިރިކަލުން އާދަމް ރަމީޒްގެ ހަގު އަނބިކަނބަލުންނަށް ކަމުގައިވެސް ބައެއް މީޑިއާތަކުން ރިޕޯޓްކޮށްފައިވެއެވެ.

ސިހުރު ހެދުމާއި ސިހުރު ހެދުވުމުގެ މައްސަލަތަކަކީ ރާއްޖޭގައި މިފަހަކުން އިތުރުވެފައިވާ މައްސަލައެކެެވެ. އިސްލާމީ ޝަރީޢަތުގައި ސިހުރު ހަދާމީހާގެ މައްޗަށް ކަނޑައެޅިފައި އޮންނަނީ މަރުގެ އަދަބު ކަމުގައި ވާއިރު، ރާއްޖޭގެ ތާރީޚުގައި އެންމެ ފުރަތަމަ، އަދި ހަމައެކަނި މަރުގެ ޙުކުމެއް ތަންފީޒްކޮށްފައި ވަނީވެސް ސިޙްރު ހެދުމާއި ގުޅޭ މައްސަލައެއްގައެވެެ.