ރާއްޖޭގެ މަޝްހޫރު ލަވަކިޔުންތެރިޔާ އުމަރު ޒާހިރާއި ރައްޔިތުންގެ މަޖިލީހުގެ ކުރީގެ މެމްބަރު ނާޒިމްވެސް ޕީއެންސީއަށް ސޮއެކުރައްވައިފިއެވެ.

އުމަރު ޒާހިރަކީ، ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫނު ޢަބުދުލްޤައްޔޫމް އިސްވެ ހުންނަވައިގެން އުފެއްދެވި ޑީއާރްޕީގައިވެސް އިސްކޮށް މަސައްކަތް ކުރެއްވި ބޭފުޅެކެވެ. 2005 ވަނަ އަހަރުން ފެށިގެން ސިޔާސީ މަސައްކަތްތަކުގައި އޭނާ ބައިވެރިވެވަޑައިގަންނަވަމުން ގެންދެވިއެވެ. އުމަރު ޒާހިރުވެސް ވަނީ ޕީއެންސީއަށް ސޮއެކުރެއްވުމަށްފަހު އޭނާގެ މެމްބަރޝިޕް ފޯމް ރޭ ރައީސުލްޖުމްހޫރިއްޔާ ޑރ. މުހައްމަދު މުޢިއްޒާއި ޙަވާލުކުރައްވާފައެވެ.

މީގެ އިތުރުން ޢުމަރު ޒާހިރާއި ހަމައެއް ދުވަސްވަރެއްފައި ޑީއާރްޕީން ސިޔާސީ މަސައްކަތްތައް ފައްޓަވައި އަދި ފަހުން ޕީޕީއެމްއާއި އެކުވެސް ސިޔާސީ މަސައްކަތްތަކުގައި ބައިވެރިވެވަޑައިގެންނެވި، ފިޓްނަސްގެ ދާއިރާއިން ފާހަގަކޮށްލެވޭ މަޝްހޫރު ފިޓްނެސް އިންސްޓްރެކްޓަރ މުޙައްމަދު ޙާނިމްވެސް ރޭ ވަނީ ޕީއެންސީއަށް ސޮއެކުރައްވާފައެވެ.

މީގެ އިތުރުން ރޭ ޕީއެންސީއަށް ސޮއެކުރައްވާފައި ވަނީ، ރައްޔިތުންގެ މަޖިލީހުގެ 18 ވަނަ ދައުރުގައި ވައިކަރަދޫ ދާއިރާގެ ގޮނޑި  ފުރުއްވައި، އެމްޑީޕީގެ މަޖިލިސް މެެމްބަރުކަން ކުރައްވާފައިވާ މުޙައްމަދު ނާޒިމެވެ. މުޙައްމަދު ނާޒިމަކީ މީގެ ކުރިން އެމްޑީޕީގެ ހަރަކާތްތަކުގައިވެސް އިސްކޮށް މަސައްކަތް ކުރައްވާފައިވާ ފަރާތެކެވެ.

މިބޭބޭފުޅުންގެ އިތުރުންވެސް ބައެއް އެހެން ބޭފުޅުން ވަނީ، ރޭ ޕީއެންސީއަށް ސޮއެކުރައްވައި މެމްބަރޝިޕް ފޯމް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ހަވާލު ކުރައްވާފައެވެ.