ކުރިން އެމްޑީޕީ އާއި ދަ ޑިމޮކްރެޓްސްގެ މެމްބަރެއްގެ ގޮތުގައި މަސައްކަތް ކުރެއްވި، އަދި އެ ދެޕާޓީގެ ހަރުގެ ހިންގި އިމާރާތް ހ. ވެޔޮވިލާގެ ވެރިޔާ ޝަފީޢާ ޒުބައިރު ޕީއެންސީއާ ގުޅިވަޑައިގެންފިއެވެ.

ޝަފީޢާ ޒުބައިރުގެ ގެ، ހ. ވެޔޮވިލާ މިހާރު ވަނީ ޕީއެންސީގެ ހަރުގެ ހިންގުމަށް އެޕާޓީއަށް ދީފައެވެ. އެއިމާރާތަކީ، ޝަފީޢާ އެމްޑީޕީއާއި އެކު ހުންނެވި ދުވަސްވަރު އެޕާޓީގެ ސިޔާސީ ބޮޑެތި ހަރަކާތްތައް ހިންގުމަށް ބޭނުން ކުރި ޢިމާރާތެވެ.

ޝަފީޢާ ޒުބައިރު ޕީއެންސީއަށް ގުޅިވަޑައިގެން މެމްބަރޝިޕް ފޯމް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒާއި ހަވާލުކޮށްދެއްވީ، ރޭ އޭނާގެ ގޭގައި ޕީއެންސީ ހަރުގެ ހުޅުވުމަށް ބޭއްވި ރަސްމިއްޔާތުގައެވެ.

ޝަފީޢާއަކީ އެމްޑީޕީން ފެށިގެން ސިޔާސީ މަސައްކަތްތަކުގައި ހަރަކާތްތެރިވަމުން އަންނަ ބޭކަނބަލެކެވެ. އަދި ތަޢުލީމީ ދާއިރާގައި ގިނަ ޚިދުމަތްތަކެއް ކުރައްވައި، މީހުން ބިނާކުރެއްވުމުގެ ދާއިރާގައިވެސް އޭނާ ޚިދުމަތް ކުރައްވާފައިވެއެވެ. މީގެ އިތުރުން އޭނާއަކީ، ދިވެހި ދައުލަތަށް ވަރަށް ދިގުމުއްދަތެއްގައި ޚިދުމަތް ކޮށްދެއްވި، އަދި ދިވެހި އަދަބިއްޔާތަށް އަގު ނުކުރެވޭފަދަ ގިނަ ޚިދުމަތްތަކެއް ކޮށްދެއްވި، އައްނަބީލާ ޙަބީބާ ޙުސައިން ޙަބީބުގެ ދޮށީދަރިކަނބަލުންނެވެ.