ގދ. ފިޔޯރީން ގެއްލިގެން އިއްޔެ ހޯދަމުން ދަނިކޮށް ފެނުނު ކުޑަ އަންހެންކުއްޖާގެ އިތުރު ޓެސްޓްތަކެއް ހެދުމަށް، ގދ. ތިނަދޫގައި ހުންނަ ޢަބްދުއްޞަމަދު މެމޯރިއަލް ހޮސްޕިޓަލަށް ގެންގޮސްފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، އެކުއްޖާ އެ ހޮސްޕިޓަލަށް ގެންގޮސްފައި ވަނީ، ކުއްޖާ ފެނުނީ ގެއްލުނުތާ ގިނައިރުތަކެއް ފަހުން ކަމުގައިވާތީ، ހާލަތު އިތުރަށް ދެނެގަތުމަށް ބައެއް ޓެސްޓްތައް ހެދުމަށް ޑޮކްޓަރުން ލަފާ ދެއްވާފައިވާ ކަމަށެވެ. އަދި ފިޔޯރީން ބެއްލެވި ޑޮކްޓަރުންނާއި ހަވާލާދީ ކުއްޖާގެ ހާލަތު ރަނގަޅު ކަމަށް ހެލްތު ސެންޓަރުން މައުލޫމާތު ދެއްވާފައިވާ ކަމުގައިވެސް ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، އެމައްސަލަ އާއި ގުޅިގެން ބަލަންޖެހޭ ކަންކަން ފުލުހުން ބަލަމުން ގެންދާ ކަމަށެވެ. 

އިއްޔެ ގދ. ފިޔޯރީން ގެއްލުނު ކުޑަކުއްޖާ އަކީ، އުމުރުން 8 އަހަރުގެ ކުޑަ އަންހެން ކުއްޖެކެވެ. އެކުޑަކުއްޖާ އާއިލާއަށް ގެއްލުނީ އިއްޔެ ހަވީރު 17:35 ހާއިރުން ފެށިގެން ކަމަށާއި އާއިލާއިން ފުލުހުންނަށް ރިޕޯޓްކޮށްފައި ވަނީ 19:08 ގައި ކަމަށް ފުލުހުން ވިދާޅުވެފައިވެއެވެ.

ކުޑަކުއްޖާ ފެނިފައި ވަނީ ރޭ މެންދަންވުމާއި ގާތްވެފައި ވަނިކޮށް، ކުއްޖާ ދިރިއުޅޭ ގެއާއި މާދުރުނޫން ގެއެއްގެ ގޯތި ތެރޭގައި ވެއްޓިފައި އޮއްވައި ކަމުގައި އެރަށުގެ ޚަބަރުތައް ގެނެސްދޭ ބައެއް ސޯޝަލްމީޑިއާ އެކައުންޓްތަކުގެ ރިޕޯޓްކޮށްފައިވެއެވެ. އެހެން ނަމަވެސް ކުއްޖާ ފެނުނު ގަޑިއާ ފެނުނުތަން ފުލުހުން ހާމަކުރައްވާފައެއް ނުވެެއެވެ. ފުލުހުންގެ އިދާރާއިން ވިދާޅުވީ ކުއްޖާ ފެނުނު އިރު އެކުއްޖާގެ ހާލު ރަނގަޅު ކަމަށެވެ.