މިޖޫން މަހުގެ ސޯޅަވަނަ ދުވަހުގެ ފަތިހު ހުޅުމާލޭ ފިލިގަސް މަގުގައި ބަޔަކު ހިންގަމުން ދިޔަ މާރާމާރިއެއް ހުއްޓުމަށް މަސައްކަތް ކުރި، ފުލުސް އޮފިސަރެއްގެ ގައިގައި ކާރުން ޖައްސައި ފިލައިގެން ދިޔަ ދެމީހުންގެ ތެރެއިން އެކާރު ދުއްވި މީހާ ހޯދައި ހައްޔަރުކޮށްފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ އެމައްސަލައިގެ ތުހުމަތުގައި ކޯޓު އަމުރެއްގެ ދަށުން ހައްޔަރުކޮށްފައި ވަނީ، 22 އަހަރުގެ ފިރިހެނެއް ކަމަށެވެ. ބައެއް މީޑިއާތަކުން ރިޕޯޓްކޮށްފައިވާ ގޮތުގައި އެމައްސަލައިގައި ހައްޔަރު ކުރި 22 އަހަރުގެ ޒުވާނާއަކީ، ކުރީ ސަރުކާރުގައި ޑެޕިއުޓޫ ކޮމިޝަނަރ އޮފް ޕޮލިސްގެ މަޤާމު ފުރުއްވި، ޢަލީ ރަޝީދުގެ ދަރިފުޅެވެ. އަދި ފުލުސް މީހާގެ ގައިގައި ޖެއްސި ކާރަކީވެސް ކުރީގެ ޑީސީޕީ ޢަލީ ރަޝީދުގެ ނަމުގައި ރެޖިސްޓްރީކޮށްފައި އޮތް ކާރެއް ކަމުގައި ބައެއް މީޑިއާތަކުން ރިޕޯޓްކޮށްފައި ވެއެވެ.

މީގެ އިތުރުން މާރާމާރީއާ ގުޅިގެން ކުރިން ހައްޔަރުުކުރި މީހާގެ ބަންދުގެ މުއްދަތު އިތުރު ކުރުމަށް ހުޅުމާލެ މެޖިސްޓްރޭޓް ކޯޓަށް ހާޟިރު ކުރުމުން އޭނާގެ ބަންދަށް 15 ދުވަސް ޖަހައިދީފައިވާ ފުލުހުންގެ އިދާރާއިން ވިދާޅުވެފައި ވެއެވެ.