ގދ. ފިޔޯރީން ގެއްލިގެން ހޯދަމުން ދިޔަ ކުޑަކުއްޖާ ފެނިއްޖެ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، ކުޑަކުއްޖާ ފެނިފައިވާ ކަމަށާއި ކުއްޖާގެ ހާލު ރަނގަޅު ކަމަށެވެ. އަދި ކުއްޖާ ފެނުނު އިރު ފިނިވެ ހީކަރުވެފައި ގެންފައިވާތީ ޑޮކްޓަރަށް ދެއްކުމަށް އެރަށު ސިއްޙީ މަރުކަޒަށް ގެންގޮސްފައިވާ ކަމަށް ވެސް ފުލުހުން އިދާރާއިން ވިދާޅުވިއެވެ.

ފިޔޯރީގެ ޚަބަރުތައް ގެނެސްދޭ ފޭސްބުކް އެކައުންޓެއްގައި ބުނެފައި ވަނީ ކުއްޖާ ފެނިފައިވަނީ، ކުއްޖާ ދިރިއުޅޭ ގެއާ މާދުރުނޫން ގެއެއްގެ ގޯތި ތެރޭގައި ހޭނެތި ވެއްޓިފައި އޮއްވައި ކަމަށެވެ. އެހެން ނަމަވެސް އެކަމާއި ގުޅޭ ގޮތުން ފުލުހުން އެއްޗެއް ވިދާޅުވެފައެއް ނުވެއެވެ.

އުމުރުން 8 އަހަރުގެ ކުޑަކުއްޖާ ވީ ގޮތެއް ނޭނގި އާއިލާއަށް ގެއްލިފައި ވަނީ މިއަދު ހަވީރު 5:30 ހާއިރުން ފެށިގެންނެވެ. ކުއްޖާ ގެއްލިފައިވާ ކަމަށް ފުލުހުންނަށް ރިޕޯޓްކޮށްފައި ވަނީ މިރޭގެ 7:08 ހާއިރުގައި ކަމަށް ފުލުހުންގެ އިދާރާއިން ވިދާޅުވިއެވެ.