މަސްވެރިން މިފްކޯއަށްކިރުވާފައިވާ މަަހަށް ފައިސާ ނުލިބޭތީ މަސްވެރިން ކުރަމުން ގެންދާ އިޙްތިޖާޖު ޤާނޫނީ އިމުގެ ތެރޭގައި ކުރިޔަށް ގެންދިޔުމަށް ފުރުޞަތު ދެމުން ގެންދާކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން މިރޭ ނެރުނު ބަޔާނެއްގައި ވިދާޅުވީ، މަސްވެރިން ސުލްޙަވެރިކަމާއި އެކު ޤާނޫނީ އިމުގެ ތެރޭގައި އިހްތިޖާޖު ކުރުމަށް ފުރުޞަތު ދެމުން ގެންދާ ކަަމަށާއި، އަދި އިހްތިޖާޖުގެ ސަބަބުން، މިފްކޯ އައްޑޫ ފިޝަރީޒް ކޮމްޕްލެކްސްގެ އޮޕަރޭޝަންތަކަށް ހުރަސް އެޅިފައިވުމާއި އެކު އެތަނުގެ އޮޕަރޭޝަންތައް އަލުން ފެށޭނެ މާހައުލެއް އުފެއްދުމަށްވެސް ފުލުހުން މަސައްކަތް ކުރަމުންދާ ކަމަށެވެ. އަދި ފުލުހުން އަމަން ޤާއިމްކޮށް ރައްކާތެރިކަން ކަށަވަރުކުރުމަށް އަޅާފިޔަވަޅުތަކަށް، މަސްވެރިންގެ ފަރާތުންވެސް އެއްބާރުލުން ދެއްވުމަށާއި، ޤާނޫނާއި ޤަވާއިދާއި ޚިލާފު ޢަަމަލެއް ނުކުރެއްވުމަށް ފުލުހުންގެ އިދާރާއިން ވަނީ އެދިވަޑައިގެންފައެވެ.

ފުލުހުންގެ އިދާރާއިން ނެރުނު ނޫސް ބަޔާނުގައި ވިދާޅުވެފައި ވަނީ، އިޙްތިޖާޖު ކުރުމާއި، ޚިޔާލުފާޅު ކުރުމުގެ މިނިވަންކަން ބޭނުން ކުރުމުގައި، އެއްވެ އުޅުމާއި ޚިޔާލު ފާޅުކުރުމުގެ މިނިވަންކަމުގެ ޤާނޫނުތަކާއި ޤަވާއިދުތަކުގެ ޙުދޫދުގެ ތެރެއިން މަސްވެރިންގެ ޝުޢޫރުތަކާއި ކަންބޮޑުވުންތައް ފާޅުކުރުމުގައި ފުލުހުންގެ ފަރާތުން ސެކިއުރިޓީ ލައިން ޤާއިމްކޮށް މަސްވެރިންނަށް ދޭންޖެހޭ އެއްބާރުލުންވެސް ދެމުން ގެންދާނެ ކަމަށެވެ. އަދި އާއްމު މަސްލަޙަތު އިސްކުރުމަށްވެސް ފުލުހުންގެ އިދާރާއިން ވަނީ އެދިވަޑައިގެންފައެވެ.

މަސްވެރިން މިފްކޯއަށްކިރުވާފައިވާ މަަހަށް ފައިސާ ނުލިބޭތީ، މިފްކޯ އައްޑޫ ފިޝަރީޒް ކޮމްޕްލެކްސް ކައިރީގައި އިއްޔެއިން ފެށިގެން މަސްވެރިން އަންނަނީ އިޙްތިޖާޖު ކުރަމުންނެވެ.