ސަރުކާރު ހިންގާ ޕާޓީ، ޕީއެންސީގެ ހަރުގެ ހުޅުވުމަށް މިރޭ ބާއްވަން ހަމަޖައްސާފައި ރަސްމިއްޔާތު މާދަމާ ރެއަށް ފަސްކޮށްފިއެވެ.

އެޕާޓީން ހާމަކޮށްފައިވާ ގޮތުގައި މިރޭ ބޭއްވުމަށް ހަމަޖެއްސި ހަރުގެ ހުޅުވުމުގެ ރަސްމިއްޔާތު މާދަމާ ރެއަށް ފަސް ކުރީ، ވިއްސާރަވެ މޫސުމް ތަން ނުދިނުމުގެ ސަބަބުންނެވެ. ޕީއެންސީ ހަރުގެ ރަސްމީ ގޮތުން ހުޅުއްވައި ދެއްވާނީ، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ކަމުގައި އެޕާޓީން ހާމަކޮށްފައިވެއެވެ.

ޕީއެންސީގެ ރަސްމީ ހަރުގެ ހުޅުވަނީ، އެންމެ ކުރިން އެމްޑީޕީގެ ހަރުގެ އަދި އޭގެ ފަހުން ދަ ޑިމޮކްރެޓްސްގެ ހަރުގެ ހިންގި، ހ. ވެޔޮވިލާގައެވެ.

އެމްޑީޕީގެ ހަރުގެ ހިންގި އިމާރާތް، ހ. ވެޔޮވިލާއަކީ, އެމްޑީޕީގެ ކުރީގެ މެމްބަރު، ޝަފީޢާ ޒުބައިރުގެ ގެއެކެވެ. އޭނާ އެމްޑީޕީން ވަކިވެ ވަޑައިގެން ޑިމޮކްރެޓްސް އާ ގުޅިވަޑައިގަތީ، އެމްޑީޕީގެ ތެރޭގައި ހިނގި ފެކްޝަން ކޯޅުންގަނޑުގެ ތެރޭގައެވެ. ރިޔާސީ އިންތިޚާބުގައި ދަ ޑިމޮކްރެޓްސްގެ ކެންޑިޑޭޓް ބަލިވެ، ދެވަނަ ބުރުގައި އެމްޑީޕީއާ ޕީއެންސީން ވާދަކުރި އިރު، ޝަފީޢާ ތާޢީދުކުރެއްވީ، ޕީއެންސީގެ ރިޔާސީ ކެންޑިޑޭޓް އަދި މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށެވެ.