ހުޅުމާލެ އާއި ސިނަމާލެ ބުރިޖު ގުޅުވައިދޭ ހައިވޭ މަތިން ސައިކަލެއް ކަހާލައިގެން ވެއްޓި ސްރީލަންކާގެ ރައްޔިތަކު މަރުވެއްޖެއެވެ.

ފުލުހުންގެ އިދާރާއިން ވިދާޅުވީ، ސައިކަލް ކަހާލައިގެން ވެއްޓުމުގެ ހާދިސާގައި މަރުވެފައި ވަނީ، ސައިކަލު ދުއްވި ސްރީލަންކާގެ ފިރިހެނެއްކަމަށެވެ. ފުލުހުންގެ އިދާރާއިން ވިދާޅުވީ، އެމީހާ މަރުވެފައި ވަނީ ހުޅުމާލެ ހޮސްޕިޓަލުގައި ފަރުވާ ދިނުމަށްފަހުގައި، އިތުރު ފަރުވާއަށް އޭޑީކޭ ހޮސްޕިޓަލަށް ގެނެސް ފަރުވާ ދެމުން ދަނިކޮށް މިއަދު ކަމަށެވެ.

މީގެ އިތުރުން ފުލުހުން ވިދާޅުވީ، ސައިކަލު ކަހާލައިގެން ވެއްޓުމުގެ ހާދިސާ ހިނގާފައިވާ ކަމަށް ފުލުހުންނަށް ރިޕޯޓް ލިބުނީ، އިއްޔެ ހެނދުނު 6:40 ހާއިރުގައި ކަމަށެވެ. އަދި ސައިކަލު ކަހާލައިގެން ގޮސް ވެއްޓި އެމީހާ ޖެހިފައިވަނީ، ހައިވޭގެ ފެންސުގައި ކަމަށްވެސް ފުލުހުން ވިދާޅުވެފައި ވެއެވެ.

ފުލުހުންގެ އިދާރާއިން ވިދާޅުވީ، މިއެކްސިޑެންޓާއި ގުޅިގެން ބަލަންޖެހޭ ކަންކަން ފުލުހުން ބަލަމުން ގެންދާކަމަށެވެ.