ސޯމާލިއާ ތިން މީހަކު ތިބި ޑިންގީއެއް ނ. އަތޮޮޅު ފަޅުރަށަކަށް ލައްގާފައި ވަނިކޮށް ފެނިފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، ޑިންގީ ލައްގާފައި ވަނީ، ނ. ވަވަތި ނަމަކަށް ކިޔާ ފަޅު ރަށަކަށް ކަމަށެވެ. އެރަށަކީ ދަނޑުވެރިކަމާއި ދަނޑުވެރިކަމާއި ގުޅުން ހުރި މަސައްކަތްތަކަށް އަމިއްލަ ފަރާތަކަށް ދިގު މުއްދަތަކަށް ކުއްޔަށް ދޫކޮށްފައިވާ ރަށެކެވެ.

ފުލުހުންގެ އިދާރާއިން ވިދާޅުވީ، ލެއްގި ޑިންގީއަކީ ސޯމާލިއާގެ ޑިންގީއެއް ކަަމަށާއި، އޭގައި ތިބި މީހުންނަކީ ސޯމާލިއާގެ ތިން މީހުންކަމަށް މިހާތަނަށް ބެލި ބެލުމުން އެނގިފައިވާ ކަމަށެވެ. އަދި އެރަށުގައި ފުލުހުން މިހާރު ހަރަކާތްތެރިވަމުންދާ ކަމަށާއި، އެމީހުން ތިބީ، ފުލުހުންގެ ބެލުމުގެ ދަށުގައި ކަމަށްވެސް ފުލުހުންގެ އިދާރާއިން ވިދާޅުވިއެވެ.

ނ. އަތޮޅު ވަވައްޗަށް ލެއްގި ޑިންގީގައި ތިބި ސޯމާލިއާގެ 3 މީހުން -- ފޮޓޯ: ޕޮލިސް

ސޯމާލިއާއަކީ ދިވެހިރާއްޖޭގެ ހުޅަނގުން 3002 ކިލޯ މީޓަރު ދުރުގައި އޮންނަ އެފްރިކާ ބައްރުގެ އައްސޭރިފަށުގެ ޤައުމެވެ. އެޤައުމުގެ ސީދާ އިރުމަތިން އެންމެ ގާތް ޤައުމަކަށް އިންޑިއާ ކަނޑުގައި އޮންނަ ޤައުމަކީ ދިވެހިރާއްޖެއެވެ.

ސޯމާލިއާގެ އިރުމަތީ އައްސޭރި ފަށުގައި ކުދި ޑިންގީތަކުގައި، ސޯމާލިއާގެ ފޭރޭ މީހުން އިންޑިއާ ކަނޑަށް ނުކުމެ އުޅެއެވެ. މީގެ ކުރިންވެސް ޑިންގީތަކުގައި ބެހިގެން އައި ސޯމާލިއާގެ ބައެއް މީހުން ރާއްޖޭގެ ރަށްރަށަށް ލައްވެފައިވެއެވެ.

2010 ވަނަ އަހަރުގެ ނޮވެމްބަރު މަހު ސޯމާލިއާގެ ޑިންގީއެއް 7 މީހުންނާއި އެކު ފުވައްމުލަކަށް ލެއްގިއެވެ. އަދި ހަމަ އެއަހަރުގެ ޑިސެމްބަރު މަހު، ބ. އަތޮޅު ކައިރިން ދެފެން ދޭތެރޭގައި އޮތް ސޯމާލިއާގެ ޑިންގީއެއް ފެނުނެވެ. އެ ޑިންގީންވެސް ވަޒަންތަކެއް ފެނުނު ކަމުގައި އޭރު އެމްއެންޑީއެފުން ހާމަކުރައްވާފައިވެއެވެ.

2009 ވަނަ އަހަރުން ފެށިގެން 2013 ވަނަ އަހަރާއި ދެމެދު ރާއްޖެއަށް ޑިންގީތަކުގައި ބެހިގެން 40 ވުރެ ގިނަ މީހުން ލެއްގިއެވެ. އެ އެންމެން ރާއްޖެއިން ފޮނުވާލެވުނީ 2013 ވަނަ އަހަރުގައި ކަމަށް ފުލުހުން ވިދާޅުވެފައި ވެއެވެ.