މިއަހަރަށް ފށްކުރި ދައުލަތުގެ ބަޖެޓުގައި، ސިޔާސީ ޕާޓީތަކަށް ދޫކުރުމަށް ކަނޑައަޅާފައިވާ ހުރިހާ ފައިސާއެއް ދޫކޮށް ނިންމާފައިވާ ކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.

އެކޮމިޝަންގެ މެމްބަރު އަދި ތަރުޖަމާނު ޙަސަން ޒަކަރިއްޔާ ވިދާޅުވީ، އެމްޑީޕީ އާއި ޕީއެންސީ ނޫން އެހެން ޕާޓީތަކަށް ފައިސާ ދޫކޮށްފައި ވަނީ އޭޕްރީލް މަހުގެ ތެރޭގައެވެ. އަދި މެއި މަހު އެމްޑީޕީއާ ޕީއެންސީއަށްވެސް ފައިސާ ދޫކޮށް ނިންމާފައިވާ ކަމުގައި އޭނާ ވިދާޅުވިއެވެ.

ހަސަން ޒަކަރިޔާ ވިދާޅުވީ، ޕީއެންސީ އާއި އެމްޑީޕީއަށް ފައިސާ ދޫކުރުން ލަސްވީ އެ ދެޕާޓީން ފުރިހަމަ ކުރަންޖެހޭ ކަންތައްތަކެއް ނުނިމި ލަސްވުމުގެ ސަބަބުންނެވެ.

މިއަހަރު ދައުލަތުގެ ބަޖެޓުން 6 ޕާޓީއަކަށް ޖުމުލަ 44 މިލިޔަން ރުފިޔާ ދޫކޮށްފައި ވެއެވެ.

* މޯލްޑިވިއަން ޑިމޮކްރެޓިކް ޕާޓީ(އެމްޑީޕީ): 15.1 މިލިއަން ރުފިޔާ

* ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް): 10.4 މިލިއަން ރުފިޔާ

* ޖުމްހޫރީ ޕާޓީ(ޖޭޕީ): 5.3 މިލިއަން ރުފިޔާ

* މޯލްޑިވްސް ޑިވެލޮޕްމެންޓް އެލަޔަންސް(އެމްޑީއޭ): 2.4 މިލިއަން ރުފިޔާ

* ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ): 8.0 މިލިއަން ރުފިޔާ

* އަދާލަތު ޕާޓީ: 2.5 މިލިއަން ރުފިޔާ

އިލެކްޝަންސް ކޮމިޝަނުން ވިދާޅުވީ މި ޕާޓީތަކަށް ފައީސާ ކަނޑައަޅާފައިވަނީ ބޮލަކަށް 289.62 ރުފިޔާގެ މަގުންކަމަށެވެ. އެއީ ޖުމުލަ 152،266 ޕާޓީ މެންބަރުންނެވެ. ސިޔާސީ ޕާޓީތަކުގެ ދަފްތަރުގައި 11 ސިޔާސީ ޕާޓީއެއް ރަޖިސްޓްރީކޮށްފައި އެބައޮތެވެ.