ރާއްޖޭގައި އުޅޭ ބިދޭސީ މަސައްކަތު މީހުން އަތޮޅުތަކުގެ ރަށްރަށުގައި މަސައްކަތް ކުރާއިރު، ރަށު ކައުންސިލްތަކުން ހުއްދައެއް ހޯދަންޖެހޭ ގޮތަށް ހަމަޖެއްސި ނަމަވެސް އެހުއްދައަށް އެއްވެސް ފީއެއް ދައްކަން ނުޖެހޭނެ ކަމުގައި ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.

މިނިސްޓަރ އިޙްސާންދައުލަތުގެ މީޑިއާގައި ވާހަކަފުޅު ދައްކަވަމުން ވިދާޅުވީ، ރާއްޖޭގައި އުޅޭ ބިދޭސީ މަސައްކަތު މީހުން އަތޮޅުތަކުގެ ރަށްރަށުގައި މަސައްކަތް ކުރުމުގައި ރަށުކައުންސިލްތަކުން ހުއްދައެއް ނަގަންޖެހޭ ގޮތަށް ހަމަޖައްސަވާނެ ކަމަށެވެ. އެކަން ތަފްސީލްކޮށްދެއްވައި، މިނިސްޓަރ އިޙްސާން ކުރެއްވި ޓްވީޓެއްގައި ވިދާޅުވީ، އެ ނިންމުމަކީ. ބިދޭސީންގެ މައްސަލަ ހައްލު ކުރުމުގެ ގޮތުން ކުރިއަށް އޮތް 3 އަހަރަށް ކުރިޔަށް ގެންދާ ޕްލޭންގެ ތެރޭގައި ހިމަނާފައިވާ ކަމެއް ކަމަށެވެ. އަދި ރާއްޖޭގައި ދިރިއުޅޭ ބިދޭސީންގެ ބަޔޯމެޓްރިކް މައުލޫމާތު އެއްކޮށް ތައްޔާރުކުރަމުންދާ ޑާޓާ ބޭސްގެ އެކްސެސްވެސް ކައުންސިލްތަކަށް ލިބިގެންދާނެ ކަމުގައި މިނިސްޓަރ ވިދާޅުވިއެވެ.

މީގެ އިތުރުން މިނިސްޓަރ އިޙްސާން ވަނީ، އަތޮޅުތަކުގެ ރަށްރަށުގައި ބިދޭސީން ދަފްތަރުކޮށް ބެލެހެއްޓުމުގެ ޤާނޫނީ ޒިންމާއެއް ކައުންސިލްތަކަށްވެސް އޮތްކަން ފާހަގަކުރައްވާފައެވެ.

ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލަތައް ހައްލުކުރުމަށްޓަކައި އެމީހުންގެ މައުލޫމާތު އެއްކޮށް ތައްޔާރުކުރާ ޑާޓާބޭސްގެ ސަބަބުން މައްސަލައަށް ހައްލެއް ހޯދޭނެކަމުގައިވެސް މިނިސްޓަރ އިޙްސާން ފާހަގަކުރައްވާފައިވެއެވެ.

ބިދޭސީންގެ މައުލޫމާތު އެއްކުރުމަށް "ކުރަނގި"ގެ ނަމުގައި، ޚާއްޞަ އޮޕަރޭޝަނެއް މިދިޔަ މަހުގައި ވަނީ ފަށާފައެވެ.