ރޭ މާލޭ މެހެލި ގޯޅީގައި ހުރި ސައިކަލުތަކެއްގައި ރޯކޮށްލީ ގަސްތުގައި ކަމަށް ބެލެވޭނެ ހެއްކެއް ފުލުހުންނަށް ލިބިފައި ނުވާކަމުގައި ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ފުލުހުން ވިދާޅުވީ، އަލިފާނުގެ އެހާދިސާ ފުލުހުން ތަޙްޤީޤު ކުރަމުންދާ ކަމަށެވެ.

ރޭ މެންދަމު 12:34 ހާއިރު، މެހެލި ގޯޅީގައި ހުރި ސައިކަލުގައި ތަކެއްގައި ރޯވެ 5 ސައިކަލާއި ބައިސްކަލެއް ވަނީ ބޭނުން ނުކުރެވޭ ވަރަށް އަނދާފައެވެ. އަލިފާނުގެ ހާދިސާ ރިޕޯޓް ކުރުމާއި އެކު 5 ވަރަކަށް މިނިޓްތެރޭ ސިފައިންގެ ފަޔަމަނުން ވަނީ އެސަރަހައްދަށް ގޮސް އަލިފާން ނިވާލާފައެވެ.

ރޭގެ އަލިފާނުގެ ހާދިސާ އަކީ ބަޔަކު ގަސްތުގައި ކުރި ކަމެއް ކަމުގެ ހެއްކެއް ފުލުހުންގެ ތަޙްޤީޤަށް މިހާތަނަށް ލިބިފައި ނެތް ކަމަށް ފުލުހުން ވިދާޅުވި ނަމަވެސް، އެއީ ބަޔަކު ގަސްތުގައި ހިންގި އަމަލެއް ކަމަށް ބައެއް މީޑިއާތަކުންވަނީ ރިޕޯޓްކޮށްފައެވެ. އަދި މަތިން އެއްޗެއް ވައްޓާލުމުގެ ސަބަބުން ސައިކަލްތަކުގައި ރޯވިކަން އެސަރަހައްދުގައި ހުރި އަމިއްލަ މީހުންގެ ޢިމާރާތްތަކުގެ ސީސީޓީވީ ކެމެރާތަކަށް އަރާފައިވާ ކަމުގައިވެސް ރިޕޯޓްކޮށްފައިވެއެވެ، އެހެން ނަމަވެސް އެކަމާއި ގުޅޭ ގޮތުން މިހާތަނަށް ފުލުހުން އެއްވެސް އެއްޗެއް ވިދާޅުވެފައެއް ނުވެއެވެ.

މީގެ ކުރިން ވަނީ، މަޖިލިސް ކުރާގޭގެ އުތުރުން އޮތް ޕާކިން ޒޯނުގައި ހުރި ސައިކަލްތަކެއްގައިވެސް މީހަކު ގަސްދުގައި ރޯކޮށްލާފައެވެ. އެކަން ކުރިކަމަށް ތުހުމަތު ކުރެވޭ މީހާ ހޯދައި ފުލުހުން ވަނީ އެމީހާ ހައްޔަރުކޮށްފައެވެ.