މާރާމާރީ ހުއްޓުވުމަށް މަސައްކަތް ކުރި ފުލުހެއްގައިގައި ކާރުން ޖެއްސުމަށްފަހު ފިލި ދެމީހުންގެ ތެރެއިން އެކަކު ހޯދައި ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ، ރޭ ފަތިހު 4:07 ހާއިރު ހުޅުމާލެ ފިލިގަސް މަގުގައި ބަޔަކު މާރާމާރީ ހިންގާ ކަމުގެ ރިޕޯޓް ލިބިގެން އެތަނަށް ފުލުހުން ދިޔުމުން މާރާމާރީ ހިންގުމުގައި ބައިވެރިވި މީހުންގެ ތެރެއިން ދެމީހަކު ކާރެއްގައި ފިލަން މަސައްކަތް ކުރި ކަމަށާއި، އެކާރު ހުއްޓުވުމަށް މަސައްކަތް ކުރި ފުލުސް މީހާގެ ގައިގައި ކާރު ޖެއްސުމަށްފަހުގައި އެމީހުން ފިލައިގެން ދިޔަ ކަމަށެވެ. އެހެން ނަމަވެސް ފިލި ދެމީހުންގެ ތެރެއިން އެކަކު ހޯދައި މިހާރު ހައްޔަރުކޮށްފައިވާ ކަމަށާއި އަނެއް މީހާ ހޯދުމުގެ މަސައްކަތް ކުރަމުންދާކަމުގައި ފުލުހުންގެ އިދާރާއިން ވިދާޅުވެފައިވެއެވެ.

ފުލުހުންގެ އިދާރާއިން ވިދާޅުވީ، މާރާމާރީގައި އަނިޔާވި މީހާ އަށާއި، ފިލަން އުޅުނު މީހުން ކާރު ޖެއްސުމުގެ ސަބަބުން އަނިޔާވި ފުލުސް އޮފިސަރަށް ހުޅުމާލެ ހޮސްޕިޓަލްގައި ފަރުވާ ދިނުމަށްފަހުގައި މިހާރު ދޫކޮށްލާފައިވާ ކަމަށެވެ.

އިއްޔެ އާއި މިއަދު މާލެ ސަރަހައްދުގައި ހިނގާ މާރާމާރީތައް ވަނީ އިތުރުވެފައެވެ.