މާލޭ ދަރުބާރުގޭކައިރީގައި ރޭ ހިންގި މާރާމާރީ އާއި ގުޅިގެން މިހާތަނަށް ހައްޔަރުކޮށްފައިވާ 4 މީހުންވެސް ޝަރީއަތް ނިމެންދެން ބަންދުކޮށްފިއެވެ.

ފުލުހުންގެ އިދާރާއިން ވިދާޅުވީ، ރޭ ހިނގި އެމާރާމާރީއާގުޅިގެން ހައްޔަރުކޮށްފައި ވަނީ ދިވެހި 4 ފިރިހެނުން ކަމަށާއި އެމީހުންގެ ބަންދާއި މެދު ގޮތެއް ނިންމުމަށް ކުރިމިނަލްކޯޓަށް ހާޟިރު ކުރުމުން އެމީހުން ޝަރީއަތް ނިމެންދެން ބަންދުކޮށްފައި ބޭތިއްބުމަށް ކުރިމިނަލްކޯޓުން އަމުރު ދީފައިވާ ކަމަށެވެ.

ފުލުހުންގެ އިދާރާއިން ވިދާޅުވީ މިމާރާމާރީގެ މައްސަލަ ބަލަމުންދާ ކަަމަށެވެ.

މީގެ އިތުރުން މިއަދު މާލެއާ ހުޅުމާލޭގައިވެސް ވަނީ އިތުރު މާރާމާރީތަކެއް ހިނގާފައެވެ.

މިގޮތުން މިއަދު މެންދުރު 12:45 ހާއިރު، ހެންވޭރު ޝަހީދު ޢަލީ މިސްކިތް ކައިރީގައި ހިނގި މާރާމާރީއެއްގައި ދެމީހަކު ޒަޚަމްވެ ހޮސްޕިޓަލަށް ފަރުވާދޭން ގެންދެވިފައިވާ ކަމުގައި ފުލުހުންގެ އިދާރާއިން ވިދާޅުވިއެވެ.