ދިވެހިރާއްޖެއިން މިއަހަރު ހައްޖަށް ދިޔަ ހުރިހާ ހައްޖުވެރިންވެސް ތިބީ، ޢަރަފާތު ބިމުގައި ކަމަށް ހައްޖު މިޝަންއިން ބުނެފިއެވެ.

މޯލްޑިވްސް ހައްޖު މިޝަން އިން ބުނީ، ހުރިހާ ހައްޖުވެރިންވެސް ޢަރަފާތު ބިމަށް ގޮސްފައިވާ ކަމަށާއި، ހުރިހާ ހައްޖާޖީންގެ ޙާލުވެސް އާއްމު ގޮތެއްގައި ރަނގަޅުކަމަށެވެ. ހައްޖު މިޝަން އިން ހާމަކޮށްފައިވާ ގޮތުގައި، އަރަފާތު ބިމަށް ހައްޖުވެރިން ދަތުރުފެށީ، ރޭ މައްކާގެ ގަޑިން 11:30ގައެވެ. އަދި ފަތިސް ނަމާދުު ވަގުތުގެ ކުރިން ހުރިހާ ހައްޖުވެރިންނަށްވެސް ޢަރަފާތު ބިމަށް ވަދެވިފައިވާ ކަމުގައި މައުލޫމާތު ލިބިފައިވެއެވެ.

ހައްޖުގެ އެންމެ މުހިއްމު ރުކުނަކީ، ޢަރަފާތުގައި ހުރުމެވެ. ހައްޖު ދުވަހުގެ އިރު އޮއްސުމުގެ ކުރިން ޢަރަފާތު ބިމަށް ނުވަދެވުނު މީހަކަށް ޙައްޖެއް ނުލިބޭނެއެވެ. އެހެންވެ ހައްޖާޖީންގެ ތެރެއިން ބަލިހާލަތު ބޮޑުވެ ހޮސްޕިޓަލްތަކުގައި އެނދުމަތި ކުރެވިފައިވާ ބަލި މީހުންވެސް، އެމްބިއުލާންސްތަކުގައި ޢަަރަފާތުބިމަށް ގެންގޮސްދެއެވެ.

ޢަރަފާތުގައި މަޑުކުރުމަށްފަހު، ހައްޖުވެރިން ދެން ދަތުރުކުރާނީ، މުޒުދަލިފާއަށެވެ. ޖަމްރާތަކަށް ހިލައުކާނީ މާދަމާއިން ފެށިގެންނެވެ.

ރާއްޖެއިން މިއަހަރު ޢަމީރުލްޙައްޖުގެ ގޮތުގައި، ވަޑައިގެންނެވީ މިނިސްޓަރ އޮފް އެޑިޔުކޭޝަން އިސްމާޢީލް ޝަފީޢުއެވެ.