އާއްމު ދަތުރުފަތުރަށް ދަތިވާގޮތަށް މާލޭގެ މަގުތަކުގައި ޕާކުކޮށްފައި ހުރި ގިނަ ހަތަރު ފޮޅުލީ ގިނަ އަދަދެއްގެ ވެހިކަލް ފުލުހުން ޓޯވކޮށްފިއެވެ.

ފުލުހުންގެ އިދާރާއިން ވިދާޅުވީ، ބުރާސްފަތި ދުވަހާއި ހުކުރު ދުވަހު، 163 އުޅަނދެއް ޓޯވކޮށްފައިވާ ކަމަށެވެ. އޭގެތެރޭގައި ރަޖިސްޓްރީކޮށްފައި ނުވާ އުޅަނދެއްވެސް ހިމެނޭ ކަމަށް ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވެފައިވާ ގޮތުގައި ހަތަރުފުރޮޅުލީ އުޅަނދުތައް ޓޯވކޮށްފައިވަނީ، އަމީނީ މަގުންނާއި، އިއްޒުއްދީން މަގުންނާއި، ބޮޑު ތަކުރުފާނު މަގުންނެވެ.

މިގޮތުން ބޮޑު ތަކުރުފާނު މަގު، ކަޅުތުއްކަލާ ކޮއްޓާއި ހިސާބުން ފެށިގެން ފަތާ ޓްރެކާއި ހަމައަށް އެމަގުން 84 އުޅަނދު ނަގާފައިވާ ކަމަށް ފުލުހުންގެ އިދާރާއިން ވިދާޅުވިއެވެ. ފުލުހުންގެ އިދާރާއިން ވިދާޅުވީ އަނެއް 79 އުޅަނދު ނަގާފައި ވަނީ، ބޮޑު ތަކުރުފާނު މަގު ސެނަހިޔާ ހޮސްޕިޓަލުން ފެށިގެން މާގިރި ހޮޓަލާއި ދެމެދުންނާއި، އަދި އަމީނީމަގުންނާއި، އިއްޒުއްދީން މަގުން ކަމަށެވެ.

އާއްމު ދަތުރު ފަތުރަށް ދަތިވާ ގޮތަށް މަގުތަކުގައި ޕާކުކޮށްފައި ހުންނަ ކާރާއި ޕިކަޕްފަދަ ހަތަރުފުރޮޅުލީ އުޅަނދުތައް ޓޯވ ކުރި ނަމަވެސް މާލޭގައި ޤަވާއިދާ ޚިލާފަށް ޕާކުކުރުމުގެ މައްސަލައަށް ހައްލެއް ނުލިބެއެވެ.