ރާއްޖެއިން ބޭރުން އަލަށް ބަނދެގެން ގެނެސް ފެރީ ދަތުރުތައް ފެށި، "ވެލިމާ ސްޕީޑް" ނަމަކަށް ކިޔާ ލޯންޗެއް ތ. ކިނބިދޫ ނެރު ފަސްގަނޑަށް އަރައި ފަޅުވެރިންނަށް އަނިޔާވެ ބޮޑެތި ގެއްލުންތަކެއް ލިބިއްޖެއެވެ.

މިއަދު ހަވީރު ހިނގި މިހާދިސާ ހިނގާފައި ވަނީ، ފެރީ ލޯންޗު ކިނބިދޫއިން ނުކުންނަށް އުޅުމުގެ ތެރޭގައި ބާރު ސްޕީޑުގައި ދުއްވާފައި ދަނިކޮށް ކޮންޓްރޯލް ނުވެގެން ކަމުގައި މައުލޫމާތު ލިބިފައިވެއެވެ.

ފޮޓޯތަކާއި ވީޑިއޯތަކުން ފެންނަ ގޮތުގައި އެލޯންޗު މަޑުވެފައި ވަނީ ގަސްތަކުގެ ތެރެއަށް އަރައިގެން ގޮހެވެ.

މިހާދިސާގައި ލޯންޗު ދުއްވި ކެޕްޓަނަށާއި، ލޯންޗުގައި އެވަގުތު ތިބި ދެފަޅުވެރިންނަށްވެސް ކުދި އަނިޔާތަކެއް ލިބުނުކަމުގައި މައުލޫމާތު ލިބިފައިވެއެވެ.

މާލެއިން ތ އަތޮޅަށް ފެރީ ދަތުރުތައް ކުރަންފެށި، ވެލިމާ ސްޕީޑް ފެރީ ލޯންޗަކީ، ތ. އަތޮޅާއި މ.އަތޮޅުގެ ބައެއް ރަށްރަށަށް ދަތުރު ކުރަންފެށި ފެރީއެކެވެ. އެފެރީ ލޯންޗުގެ ފުރަތަމަ ދަތުރު މާލެއިން ތ. އަތޮޅަށް ކުރީ މިއަދުއެވެ. ހާދިސާ ހިނގީ ފުރަތަމަ ފެރީ ދަތުރު ނިންމާފައި ލޯންޗު ކިނބިދޫއިން ފުރައިގެން ނުކުންނަށް އުޅުމުގެ ތެރޭގައި ކަމަށް އެނގިފައިވެއެވެ.

ވެލިމާ ސްޕީޑް ފެރީ ލޯންޗަކީ، 52 މީހުންގެ ޖާގައިގެ، ހޮންޑާ 250 ހޯސްޕަވަރުގެ 4 އިންޖީނު އަޅާފައި ހުރި ލޯންޗެކެވެ. މިހާދިސާގައި ލޯންޗުގެ އިންޖީނުތަކަށް ގެއްލުންވެ، ލޯންޗުގެ ބަނޑުފިލާވެސް ފަޅައިގެން ގޮސްފައިވާ ކަމުގައި މައުލޫމާތު ލިބިފައިވެއެވެ.