މޯލްޑިވްސް އެއަރޕޯޓްސް ކޮމްޕެނީ ލިމިޓެޑާއި، މޯލްޑިވްސް ނެޝަނަލް އެއަރޓްރެފިކް ސަރވިސަސް (އެމްނެޓްސް) ގުޅިގެން ކުރިޔަށް ގެންދިޔަ އެޕްރޯޗް ކޮންޓްރޯލް ސަރވޭލަންސް (އައިކާއޯ 054) ކޯސް ނިންމުމުގެ ރަސްމިއްޔާތު ބާއްވައިފިއެވެ.

އެމްއޭސީއެލް އިން ހާމަކުރައްވާފައިވާ ގޮތުގައި، މި ކޯހަކީ އިންޓަރނޭޝަނަލް ސިވިލް އޭވިއޭޝަން އޮގަނައިޒޭޝަން (އައިކާއޯ) ސެޓިފައިޑް އަދި ސިވިލް އޭވިއޭޝަން އޮތޯރިޓީ އޮފް މޯލްޑިވްސްއިން ޤަބޫލުކުރާ ފެންވަރުގެ، އެޕްރޯޗް ކޮންޓްރޯލް ސަރވޭލަންސް ކޯހެކެވެ. މީގެ ކުރިން ގްލޯބަސް އެއަރ ޓްރެފިކް ސަރވިސަސްއާއި ގުޅިގެން ކުރިޔަށް ގެންދާ މިކޯހުގައި މިފަހަރު ކިޔަވައި ދެއްވާފައި ވަނީ ދިވެހި އިންސްޓްރަކްޓަރުން ކަމަށާއި، މި ގޮތުން 4 އިންސްޓްރަކްޓަރުން ކިޔަވައިދެއްވާފައިވާއިރު، މިފަހަރުގެ ބެޗްގައި 5 މުވައްޒަފުން ވަނީ ތަމްރީނު ކުރެވިފައި ކަމުގައި އެމްއޭސީއެލްއިން ހާމަކުރައްވާފައިވެއެވެ. މިއީ މިފަދަ ކޯހެއް ދިވެހި އިންސްޓްރަކްޓަރުންނާއެކު ކުރިއަށް ގެންދިޔަ ފުރަތަމަ ފަހަރުކަމުުގައިވެސް އެމްއޭސީއެލްއިން ވިދާޅުވެފައި ވެއެވެ.

މި ކޯސް ނިންމުމަށްޓަކައި ވެލާނާ އިންޓަރނޭޝަނަލް އެއަރޕޯޓްގައި ބޭއްވި ރަސްމިއްޔާތުގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ ސީ.އީ.އޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު އަދި މޯލްޑިވެސް ނެޝަނަލް އެއަރ ޓްރެފިކް ސަރވިސަސްގެ މެނޭޖިންގ ޑިރެކްޓަރ އިބްރާހިމް ޠާހާ އާއި ދެކުންފުނީގެ މެނޭޖްމަންޓުގެ ބޭފުޅުން ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ވާހަކަ ދައްކަވަމުން އެމް.އޭ.ސީ.އެލްގެ ސީ.އީ.އޯ އަދި މެނޭޖިންގ ޑިރެކްޓަރ އިބްރާހީމް ޝަރީފް ވަނީ އެއަރޓްރެފިކް ކޮންޓްރޯލަރުން އަދާކުރާ ވަޒީފާގެ މުހިއްމުކަމާއި އެކަމުގައި ސަމާލުކަން ދޭންޖެހޭ ކަންކަމުގެ މައްޗަށް އަލިއަޅުއްވާލައްވާފައެވެ. އަދި މީގެ އިތުރުން އެމްނެޓްސްއަކީ އަލަށް އުފެދުނު ކުންފުންޏަކަށްވުމާއެކު ކުންފުނީގެ މަސައްކަތްތައް އިތުރަށް ހަރުދަނާކުރުމުގެ މުހިއްމުކަމާމެދުވެސް ވާހަކަ ދެއްކެވިއެވެ.

މި ރަސްމިއްޔާތުގައި ވާހަކަ ދައްކަވަމުން އެމްނެޓްސް ގެ މެނޭޖިންގ ޑިރެކްޓަރ އިބްރާހިމް ޠާހާ ވިދާޅުވީ، މިފަދަ ކޯސްތައް ރާއްޖޭގައި ހިންގުމުގެ ޤާބިލްކަން އެބަހުރިކަމަށާއި އަދި އެކަމުގެ ސަބަބުން މުވައްޒަފުން ތަމްރީންކުރުމަށް ކުރާ ހޭދަ އެތައް ގުނައެއް ކުޑަކުރެވިފައިވާކަމަށެވެ. އަދި ދިވެހި އިންސްޓްރަކްޓަރުންނާއި އެކު މިކޯސް ފުރިހަމަ ކުރެވުމަކީ މިދާއިރާގެ އިންސާނީ ވަސީލަތްތައް ތަރައްޤީކުރުމަށް ދުރާލާ ރާވައިގެން ކުރެވުނު މުހިންމު މަސައްކަތުގެ ނަތީޖާކަމަށްވެސް ޠާހާ ވިދާޅުވިއެވެ.

މި ކޯހަކީ ރާއްޖޭގެ އެއަރ ޓްރެފިކް ކޮންޓްރޯލް އޮފިސަރުން ތަމްރީންކުރުމަށް ކުރިއަށް ގެންދާ ކޯހެކެވެ. މިފަދަ ތަމްރީނު ހިންގުމަށް މުހިންމު ވަސީލަތެއް ކަމަށްވާ އެއާ ޓްރެފިކް ކޮންޓްރޯލް (އޭ.ޓީ.ސީ) ޓަވަރު ސިމިއުލޭޓަރެއް 2021 ވަނަ އަހަރު ވަނީ އެމް.އޭ.ސީ.އެލްއިން ބޭނުން ކުރަން ފަށާފައެވެ. މީގެ އިތުރުން 2023 ވަނަ އަހަރު އެމްއޭސީއެލް އިން ވަނީ އޭރިއާ ކޮންޓްރޯލް ޕްރޮސީޖަރަލް ކޯހާއި (އައިކާއޯ 055) އެޕްރޯޗް ކޮންޓްރޯލް ޕްރޮސީޖަރަލް ކޯސް (އައިކާއޯ 053) ކުރިއަށް ގެންގޮސްފައެވެ.

ރާއްޖޭގައި ބައިނަލްއަޤްވާމީ ފެންވަރުގައި އޭވިއޭޝަން ތަމްރީން ކުރިއަށް ގެންދެވުމަކީ އެމް.އޭ.ސީ.އެލްއަށް ލިބޭ ވަރަށް ބޮޑު ފަޚުރެއް ކަމުގައި އެކުންފުނިން ވިދާޅުވެފައިވެއެވެ.