ވެހިކަލްގެ ވިޔަފާރި ކުރާ ފަރާތަކާއި ޓްރާންސްޕޯޓް މިނިސްޓްރީގެ ބަޔަކު ގުޅިގެން، އަދި ނުވެސް އަންނަ އަހަރުތަކަކަށް ބައެއް އުޅަނދުތައް ރަޖިސްޓްރީކޮށްފައިވާ ކަމުގައި ދިވެހި ފުލުހުންގެ ޚިދުމަތުން ބުނެފިއެވެ.

ދިވެހި ފުލުހުންގެ ޚިދުމަތުން ހާމަކޮށްފައިވާ ގޮތުގައި، ވެހިކަލްވިޔަފާރި ކުރާ ފަރާތަކާއި، ޓްރާންސްޕޯޓް މިނިސްޓްރީގައި ތިބި ބަޔަކު ގުޅިގެން މިއަމަލު ހިންގަމުން ދިޔަކަމަށް ފުލުހުންގެ ތަޙްޤީޤަށް ހާމަވީ، އެއާޕޯޓުގައި އެމްއޭސީއެލްގެ މެނޭޖިންގ ޑައިރެކްޓަރ ވެހިކަލް އެއާޕޯޓުން ވަގަށްނަގައިގެން އެމައްސަލަ ތަޙްޤީޤު ކުރަމުން ދިޔައިރުއެވެ.

ފުލުހުންގެ އިދާރާއިން ވިދާޅުވީ އެމްއޭސީއެލްގެ މެނޭޖިންގ ޑައިރެކްޓަރުގެ ކާރު އެއާޕޯޓުން ވަގަށް ނަގައިގެން ހުޅުމާލެއަށް ގެންގޮސް ހުޅުމާލެ އޮރެންޖް ހިޔާކައިރީގައި، ބާއްވާ ނަމްބަރ ޕްލޭޓް ބަދަލުކޮށްގެން މާލެއަށް ގެނައިކަން ތަޙްޤީޤަށް ހާމަވެފައިވާ ކަމަށެވެ. އަދި އެވެހިކަލް ގެންގޮސް ވައްދާފައި ވަނީ ހެންވޭރު، އީރާނުގޭގެ ގްރައުންޑް ފްލޯގައި، ހުރި ގަރާޖެއްގެ ތެރެއަށް އެ ވެހިކަލް ވެއްދިކަންވެސް ފުލުހުންނަށް ހޯދިފައިވާ ކަމުގައި ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ އެމްއޭސީއެލްގެ ކާރު ފެނުނު ގަރާޖު ކުއްޔަށް ނަގައިގެން އުޅުނު، މ. މޮޑަން ކޮމެޓް އަހްމަދު ނިޒާމް,(23އ) އާއި އެއުޅަނދު ވަގަށް ނެގުމަށް އެހީތެރިވެދިން ކަމަށް ތުހުމަތު ކުރެވުނު، މ. ސީނިއަސުރުމާގެ  މުހައްމަދު ހައިޝަމް, (42އ) ފުލުހުން ހައްޔަރުކޮށްފައިވާ ކަމަށެވެ.

ފުލުހުން ވިދާޅުވީ، އެގަރާޖުގެ ތެރެއިން ކުރިން ވަގަށް ނަގާފައިވާ ކަމަށް ފުލުހުންނަށް ރިޕޯޓްކޮށްފައިވާ އިމިގްރޭޝަންގެ ކާރުވެސް ފެނިފައިވާ ކަމަށެވެ. މީގެ އިތުރުން އެގަރާޖުގެ ތެރޭގައި ގިނަ އަދަދެއްގެ އުޅަނދުތަކުގެ ބައިތައް ހުރިކަން ފާހަގަކޮށް ފުލުހުން ވިދާޅުވީ، ވަގަށް ނަގައިގެން ގެންނަ އުޅަނދުތަކުގެ އިންޖީނު  ނަމްބަރާއި ޗެސިސް ނަމްބަރު ކަހާލައި، ޓްރާންސްޕޯޓް މިނިސްޓްރީގެ ތެރެއިން ބަޔަކާއި ގުޅިގެން ރަޖިސްޓްރީކޮށް ވިއްކައި ވިޔަފާރި ކުރަމުން ދިޔަކަށް ފާހަގަކުރެވިފައިވާ ކަމަށެވެ.

ފުލުހުންގެ އިދާރާއިން ވިދާޅުވީ، އަހްމަދު ނިޒާމްއާ އޭނާގެ އަންހެނުންގެ ނަންމަތީގައި 100 ގިނަ އުޅަނދު ރަޖިސްޓްރީކޮށްފައި ހުރި އިރު އޭގެ ތެރޭގައި، ހަތަރު ފުރޮޅުލީ އެއްގަމު އުޅަނދުގެ 86 ވެހިކަލް ހިމެނޭ ކަމަށެވެ. ފުލުހުން ވިދާޅުވީ، އޭގެ ތެރެއިން ބައެއް ކާރުގެ ރަޖިސްޓްރީ ހަދާފައި ވަނީ 2025ވަނަ އަހަރަށާއި، 2027 ވަނަ އަހަރަށްކަން ފާހަގަކުރެވިފައިވާ ކަމަށެވެ. އަދި ކުށުގެ މިޢަމަލުތައް ހިންގާފައި ވަނީ ޓްރާންސްޕޯޓް މިނިސްޓްރީގެ ތެރެއިން ބަޔަކާއި ގުޅިގެންކަންވެސް ފުލުހުންގެ އިދާރާއިން ފާހަގަކުރައްވާފައިވެއެވެ.