މަސްވެރިން މިފްކޯއަށް ކިރުވާފައިވާ މަހުގެ އަގަށް މިހާތަނށް ނުދޫކުރެވި ހުރި 80 މިލިއަން ރުފިޔާގެ ތެރެއިން 46 މިލިޔަން ރުފިޔާ މަސްވެރިންނަށް ދޫކޮށް ނިންމާނެ ކަމުގައި އެކުންފުނިން ބުނެފިއެވެ.

މަސްވެރިންނަށް ފައިސާ ނުލިބޭ މައްސަލަ އާއި ލޭނުގެ މަސްވެރިކަމަށް ބޭރުގެ ފަރާތްތަކަށް ހުއްދަދޭން އުޅޭ މައްސަލަ އާއި މަސްވެރި އޮޑިފަހަރަށް އަގުބޮޑުކޮށް ޑީސަލް ވިއްކާތީި، އިއްޔެ މަސްވެރިން ވަނީ އެކަމާއި ދެކޮޅަށް އިޙްތިޖާޖުކޮށްފައެވެ. މަސްވެރިންގެ އެ އިހްތިޖާޖުގައި އިސްކޮށް ހަރަކާތްތެރިވެފައި ވަނީ ބޮޑުކަންނެލީގެ މަސްވެރިކަން ކުރާ ފަރާތްތަކުންނެވެ.

މިފްކޯއިން ހާމަކޮށްފައިވާ ގޮތުގައި، މިފްކޯއަށް މަސްވެރިން ކިރުވާފައިވާ މަހަށް ދޭންޖެހޭ ފައިސާ މިހާރު ވަނީ އޮޑުވެރިންގެ އެކައުންޓްތަކަށް ޖަމާކުރަން ފަށާފައެވެ.

މަސްވެރިން ހާމަކޮށްފައިވާ ގޮތުގައި، މަސްވެރިން މިފްކޯއަށް ކިރުވާފައިވާ މަަހަށް ރޯދައިގެ ފަހުން އެއް ގޮތަކަށްވެސް ފައިސާއެއް ނުލިބެއެވެ. އެހެންވެ މަސްވެރިންނާއި މަސްވެރިންގެ އާއިލާތަކަށް އެކަމުގެ ސަބަބުން މާލީ ދަތިތަކާއި ކުރިމަތިވެ މަސްވެރިން ދަނޯ ސޯޝަލް މީޑިއާގައިވެސް އެކަމުގެ ކަންބޮޑުވުންތައް ފާޅުކުރަމުންނެވެ.

މިސަރުކާރު ވެރިކަމަށް އައިސްފައި ވަނީ މަސްވެރިންނަށް 48 ގަޑިއިރުގެ ތެރޭގައި ފައިސާ ދިނުމުގެ ވަޢުދާއި އެކުގައި ނަމަވެސް، ބައެއް އޮޑި ދޯނިފަހަރުން ކިރުވާފައިވާ މަހަށް ފައިސާ ނުލިބި 48 ދުވަސް ވެއްޖެކަމުގައި މަސްވެރިން ބުނެފައިވެއެވެ.