އަޟްޙާ ޢީދު ބަންދާ ދިމާކޮށް މާލެއިން އަތޮޅުތަކަށް ގިނައަދަދެއްގެ ބަޔަކު ފުރައި އަދި އަތޮޅުތަކުން މާލެއަށް ގިނަބަޔަކު ޒިޔަރަތްކުރާނެކަމަށް ބެލެވޭތީ ސަލާމަތާއި ރައްކާތެރިކަން ކަށަވަރުކުރުމަށް ހާއްސަ އޮޕަރޭޝަނެއް މެރިން ޕޮލިހުން ފަށައިފިއެވެ.

ފުލުހުންގެ އިދާރާއިން ވިދާޅުވީ، އިއްޔެ ފެށި މި އޮޕަރޭޝަން ޖޫން އީދު ބަންދު ނިމި ސަރުކާރު ހުޅުވޭ ދުވަސްކަމުގައިވާ ޖޫން 23 ވާ އާދިއްތަ ދުވަހާއި ހަމައަށް ކުރިޔަށް ގެންދާނެ ކަމަށެވެ.

ފުލުހުންގެ އިދާރާއިން ވިދާޅުވީ، މި އޮޕަރޭޝަނުގައި، މާލެ އޭރިއާގެ ބަނދަރުތަކުން ލަފާފުރާ އުޅަނދުފަހަރާއި ކަނޑުގެ ސަރަހައްދުން ދަތުރުކުރާ އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް ބަލައިފާސްކޮށް އަދި ސަލާމަތާއި ރައްކާތެރިކަމާ ގުޅޭގޮތުން މައުލޫމާތުދެމުން ގެންދާނެ ކަމަށެވެ. މީގެ އިތުރުން، އަތޮޅުތަކުން ލަފާފުރާ އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް މައުލޫމާތުދިނުމާއި ބަލައިފާސްކުރުމުގެ ކަންކަން އަތޮޅުތަކު ޕޮލިސް ސްޓޭޝަންތަކުންވެސް ކުރިޔަށް ގެންދާނެ ކަމުގައި ފުލުހުންގެ އިދާރާއިން ބުނެފައިވެއެވެ.

ކޮންމެ އަހަރެއްގައިވެސް ސްކޫލު ޗުއްޓީ އާއި އަދި އީދު ބަންދާއި ދިމާކޮށް މެރިން ޕޮލިސް އާއި ކޯސްޓްގާޑުންވެސް އުޅަނދުތައް ބަލައި ފާސްކުރުމުގެ އޮޕަރޭޝަންތައް ހިންގައެވެ. ކުރިން މިއޮޕަރޭޝަންތައް ހިންގަނީ ހަމައެކަނި މާލެއަށް ލަފައި ފުރާ އުޅަނދުތަކަށް އަމާޒުކޮށްގެން ނަމަވެސް، އަތޮޅުތަކުގެ ރަށްތަކުން ލަފައި ފުރާ އުޅަނދުތައް ޗެކްކުރުމުގެ މަސައްކަތް ފުލުހުން މިހާރު ވަނީ އިތުރުކޮށްފައެވެ.