ނުރައްކާތެރި މާއްދާތަކެއް އެކުލެވިފައިވާތީ، ތައިލެންޑްގެ ކުންފުންޏަކުން އުފައްދާ 15 ބޭހެއް ބޭނުން ކުރުމާއި، ރާއްޖެއަށް އެތެރެކުރުން މަނާކޮށްފިއެވެ.

މޯލްޑިވްސް ފުޑް އެންޑް ޑްރަގް އޮތޯރިޓީން ހާމަކޮށްފައިވާ ގޮތުގައި، ބޭނުންކުރުމާއި ރާއްޖެ އެތެރެކުރުން މަނާކޮށްފައި ވަނީ، ތައިލެންޑްގެ ކުންފުންޏެއް ކަމަށްވާ، ސެވެން ސްޓަރސް ފާމަސޫޓިކަލް ކޮމްޕެނީ ޕްރައިވެޓް ލިމިޓެޑުން އުފައްދާފައިވާ 15 ބޭހެކެވެ. އެބޭސްތައް ބޭނުން ކުރުމާއި، ރާއްޖެ އެތެރެކުރުން މަނާކޮށްފައި ވަނީ، އެބޭސްތަކުގައި، ބޭނުންކޮށްފައިވާ، ސަބިޓޮލް (އެކްސީޕިއެންޓެއް)ގައި  ނުރައްކާތެރި ކެމިކަލްގެ މާއްދާއެއް އެކުލެވިގެންވާތީ، ތައިލޭންޑްގެ ފުޑް އެންޑް ޑްރަގް އޮތޯރިޓީން އެބޭސްތައް ބޭނުންކުރުން މަނާކޮށް އަދި ވިއްކުން މަނާކޮށް އެޅިފިޔަވަޅުތަކާއި ގުޅިގެންނެވެ. މޯލްޑިވްސް ފުޑް އެންޑް ޑްރަގް އޮތޯރިޓީން ބުނީ، އެބޭސްތަކުގައި ދިމާވި މައްސަލަތައް ތައިލޭންޑްގެ ފުޑް އެންޑް ޑްރަގް އޮތޯރިޓީން ހިއްސާކޮށްފައިވާ ކަމަށެވެ.

އަދި ތައިލޭންޑްގެ އެބޭސްތަކަކީ، ކުރިންވެސް ރާއްޖޭގައި ވިއްކުމާއި ބޭނުން ކުރުމުގެ ހުއްދަ ދީފައިވާ ބޭސްތަކެއް ކަމުގައި ނުވިނަމަވެސް، ތައިލެންޑަކީ، ދިވެހިން ވަރަށް ގިނައި ގޮސް އުޅޭ ޤައުމަކަށް ވުމާއި އެކު އާއްމުން އެކަމަށް ސަމާލުވުމަށް އެމްއެފްޑީއޭއިން ވަނީ އެދިފައެވެ. މީގެ އިތުރުން އެމްއެފްޑީއޭއިން ވިދާޅުވީ، ބޭސް ސިޓީއަށް ބޭސް އެތެރެކުރާއިރު، ޚާއްޞަ ސަމާލުކަމެއްދީގެންޕޯޓުތަކުގައި ބަލައި ފާސްކުރާނެ ކަމަށެވެ.

އެމްއެފްޑީއޭއިން ވަނީ މަނާކޮށްފައިވާ ބޭސްތަކުގެ ލިސްޓް ގެޒެޓުގައި ޝާއިއުކޮށްފައެވެ.