ފަލަސްތީނަށް އެހީވުމަށް އުފައްދާފައިވާ ޔުނައިނެޑް ނޭޝަންސް ރިލީފް އެންޑް ވޯކްސް އެޖެންސީ ފޮރ ފަލަސްތީން ރެފިއުޖީސް, (UNRWA) ފަންޑަށް ރާއްޖެއިން ކޮންމެ އަހަރަކު ދެމުންނަ އެހީ 50،000 ޑޮލަރަށް ބޮޑު ކުރެއްވުމަށް ސަރުކާރުން ނިންމަވައިފިއެވެ.

ފަލަސްޠީނުގެ ރައްޔިތުންނަށް އެހީވުމަށްޓަކައި ޤައުމީ ފެންވަރުގައި ބާއްވާ ޚާއްޞަ ޓެލެތޯން 'ފަލަސްޠީނާއެކު ދިވެހީން' ފެށުމުގެ ރަސްމިއްޔާތުގައި މިކަން އިޢުލާނު ކުރެއްވީ، ރާއްޖޭގެ ޚާރިޖީ ވަޒީރު، މޫސާ ޒަމީރެވެ.

ޔުނައިނެޑް ނޭޝަންސް ރިލީފް އެންޑް ވޯކްސް އެޖެންސީ ފޮރ ފަލަސްތީން ރެފިއުޖީސް, ފަންޑަށް މިހާތަނަށް ރާއްޖެއިން ދެމުން އައީ އަހަރަކު 5000 ޑޮލަރުގެ އެހީއެކެވެ. އެހެން ނަމަވެސް އެއަދަދު 10 ގުނައަށް އިތުރު ކުރައްވައި، މީގެ ފަހުން ކޮންމެ އަހަރަކު 50 ހާސް ޑޮލަރު ދިވެހި ސަރުކާރުން މި ފަންޑަށް ޖަމާކުރަމުން ދާނޭކަމުގައި ފޮރިން މިނިސްޓަރ މޫސާ ޒަމީރު މިއަދު ވަނީ ވިދާޅުވެފައެވެ.

ފަލަސްތީނަށް އެހީވުމަށް އުފައްދާފައިވާ ޔުނައިނެޑް ނޭޝަންސް ރިލީފް އެންޑް ވޯކްސް އެޖެންސީ ފޮރ ފަލަސްތީން ރެފިއުޖީސް، ފަންޑަކީ، އދ މަޖިލީހުން 1948 ވަނަ އަހަރު ފާސްކުރި ޤަރާރަކުން ވުޖޫދަށް ގެނައި ފަންޑެކެވެ. މިފަންޑަށް އިސްލާމީ ދުުނިޔޭގެ ޤައުމުތަކުންނާއި ދުނިޔޭގެ އެހެން ޤައުމުތަކުންވެސް އަންނަނީ އެހީތައް ފޯރުކޮށްދެމުންނެވެ.

ގާޒާގައި އިޒްރޭލުގެ ހައްުދު ފަހަނައެޅި ޞަޙްޔޫނީ ސިފައިން، ޤަތުލްޢާއްމުތައް ހިންގަމުން އަންނަތާ 8 މަހަށްވުރެ ގިނަ ދުވަސްވެފައި ވާއިރު، މުޅި ގާޒާ ވަނީ ސުންނާފަތިކޮށްފައެވެ. އަދި 35000 ވުރެ ގިނަ މީހުން ޝަހީދުވެފައިވާއިރު، ދޮޅުލައްކަ މީހުން ވަނީ ޒަޚަމްވެފައެވެ. މީގެ އިތުރުން ގާޒާއަށް ފެނާއި ކާބޯތަކެތި ވެއްދުން މަނާކޮށް އިޒްރޭލުން ވަނީ އުތުރު ގާޒާ ބަނޑަށް ޖައްސާފައެވެ.