ރާއްޖެއާ އިންޑިއާގެ ގުޅުމުގެ ތެރެއިން، ރާއްޖެ އަށް ރަނގަޅު ކަންތައްތައް ކުރިއަށް އޮތް ތަނުގައި ކުރިއަށް ވުރެ ވެސް ރަނގަޅުވެގެން ދާނެ ކަމަށް ޔަގީންކުރައްވާކަމުގައި، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އިންޑިއާ ސަރުކާރުގެ ދަޢުވަތަށް ކުރެއްވި ރަސްމީ ދަތުރުފުޅު ނިންމަވާލައްވަމުން، ދައުލަތުގެ މީޑިއާ ޕީއެސްއެމްއަށް ދެއްވި ބަސްދީގަތުމުގައެވެ.

ރައީސުލްޖުމްހޫރިއްޔާ ރާއްޖެއިން ބޭރަށް ކުރައްވާ މުހިއްމު ދަތުރުފުޅުތަކުގައި އެދަތުރުފުޅުތައް ނިންމަވާލެއްވުމަށްފަހުގައި، ރާއްޖޭގެ މީޑިއާތަކާއި ބައްދަލު ކުރެއްވި ނަމަވެސް، މިދަތުރުފުޅު ނިންމަވާލެއްވުމުގެ ގޮތުން ރައީސުލްޖުމްހޫރިއްޔާ ބަސްދީގަތުމެއް ދެއްވީ ހަމައެކަނި، ދައުލަތުގެ މީޑިއާ ޕީއެސްއެމްއަށެވެ.

ރައީސުލްޖުމްހޫރިއްޔާ ދައުލަތުގެ މީޑިއާއަށް ދެއްވި ކުރު ބަސްދީގަތުމުގައި، ވިދާޅުވީ އެދަތުރުފުޅަކީ ދިވެހިރާއްޖެއަށް ވަރަށް ކާމިޔާބު ދަތުރުފުޅެއް ކަމަށާއި، އަދި ވަރަށް ރަނގަޅު ދަތުރެއް ކަމަށެވެ.

ރައީސުލްޖުމްހޫރިއްޔާގެ މިބަސްދީ ގަތުމުގައި ވިދާޅުވީ، ދިވެހިރާއްޖެއަށް އެންމެ ރަނގަޅުގޮތަށް އަދި ދިވެހި ރައްޔިތުންނަށް ހެވާއި ލާބަ ލިބޭ ގޮތަށް، ދެޤައުމުގެ ގުޅުމުގެ ތެރެއިން، ކަންކަން ފަހިވެގެން ދާނެ ކަމަށެވެ.

ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާގެ ބޮޑުވަޒީރު ނަރެންދުރަ މޯދީއާ އިންޑިއާ ސަރުކާރުގެ ކައުންސިލު އޮފް މިނިސްޓަރސް ހުވާކުރެއްވުގެ ރަސްމިއްޔާތުގައި ބައިވެރިވެވަޑައިގެންނެވުމަށް ކުރެއްވި ދަތުރުފުޅުގައި އިންޑިއާއަށް ވަޑައިގެންނެވީ، އާދީއްތަ ދުވަހު ހެނދުނުގައެވެ.