އިޒްރޭލުގެ ޕާސްޕޯޓެއް އޮންނަ އެއްވެސް މީހަކު ރާއްޖެ އެތެރެވުން މަނާކުރުމަށް، ދިވެހިރާއްޖޭގެ އިމިގްރޭޝަންގެ ޤާނޫނަށް އިސްލާޙް ގެނައުމުގެ ބިލް  ރައްޔިތުންގެ މަޖިލީހަށް ބަލައިގަނެ އެބިލް 241 ކޮމިޓީއަށް ފޮނުވުމަށް ފާސްކޮށްފިއެވެ.

ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލް އަޙްމަދު ނަސީމް ހުށައެޅުއްވި މިބިލް މަޖިލީހަށް ބަލައިގަތުމަށް ފެންނަ ކަމަށް ރައްޔިތުންގެ މަޖިލީހުގެ 88 މެމްބަރުން ވޯޓު ދެއްވިއެވެ.

މަޖިލީހަށް މީކާއީލް ހުށައެޅުއްވި އިސްލާޙަކީ، ދިވެހިރާއްޖޭގެ އިމިގްރޭޝަންގެ ޤާނޫނުގެ  6 ވަނަ މާއްދާގެ (ހ)ގެ 7 ވަނަ ނަމްބަރުގެ ފަހަތަށް ނަމްބަރެއް އިތުރު ކުރުމަށް ހުށައަޅުއްވާފައިވާ އިސްލާޙެކެވެ. މިގޮތުން އެމާއްދާގެ (ހ)ގެ 8 ވަނަ ނަމްބަރުގެ ގޮތުގައި، އިޒްރާއިލް ޕާސްޕޯޓް ގެންގުޅޭ މީހުން ރާއްޖެ އެތެރެވުން ހުއްދަ ނެތް މީހުންގެ ގޮތުގައި ވަނީ ހިމަނާފައެވެ. މިގޮތުން މިމާއްދާގެ ދަށުން، އިޒްރޭލުގެ ޕާސްޕޯޓެއްގެ އިތުރުން އިތުރު އެހެން ޕާސްޕޯޓެއް އޮންނަ މީހުންވެސް ހިމަނާފައި ވަނީ ރާއްޖެއަށް އެތެރެވުމުގެ ހުއްދަ ނެތް މީހުންގެ ގޮތުގައެވެ.

Advertisement

ދުނިޔޭގެ ވަރަށް ގިނަ ޤައުމުތަކުން، ޚާއްޞަކޮށް އިސްލާމީ ދުނިޔޭގެ ޤައުމުތަކުން އިޒްރޭލަކީ ދައުލަތެއް ކަމަށް ބަލައި ނުގަންނާތީ، އެޤައުމުތަކަށް ދަތުރު ކުރުމަށް އިޒްރޭލުގެ މީހުން އެހެން ޤައުމުތަކުގެ ޕާސްޕޯޓުތައް ގެންގުޅެއެވެ.

ރާއްޖެއަށް އިޒްރޭލު މީހުން އެތެރެވުން ހުއްޓުވުމަށާއި، އިޒްރޭލް ޕާސްޕޯޓު ރާއްޖެއިން ބަލައި ނުގަތުމަށް އާއްމުން ދަނީ ސަރުކާރަށް ގޮވާލަމުންނެވެ.

އަދި އިޒްރޭލް ޕާސްޕޯޓް ރާއްޖެއިން ބަލައި ނުގަތުމަށް ވަޒީރުންގެ މަޖިލީހުން ނިންމައި އެކަން ވަނީ އިޢުލާނުކޮށްފައެވެ. މިކަމާއި ގުޅިގެން ތަޢުރީފާއި ފާޑުކިޔުން ސަރުކާރަށް އަމާޒުވެފައިވެއެވެ.