ތޮއްޑޫ ހޭޅިފަށުގައި ހުރި ގަސްތަކެއްގައި ރޯކޮށްލި މީހަކު ފުލުހުން މިއަދު ހައްޔަރުކޮށްފިއެވެ.

ފުުލުހުންގެ އިދާރާއިން ވިދާޅުވީ، އެ ޢަމަލު ހިންގިކަމުގެ ތުހުމަތުގައި ހައްޔަރުކޮށްފައި ވަނީ އުމުރުން 45 އަހަރުގެ ދިވެހި ފިރިހެނެއް ކަމަށެވެ. އަދި މައްސަލަ ތަޙްޤީޤު ކުރަމުންދާކަމުގައިވެސް ފުލުުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، ތޮއްޑޫ ބްރައިޓް އަންހެނުން މަގު ބޭރު ހޭޅިފަށުގައި އަލިފާން ރޯކޮށްލާފައިވާ ކަމުގެ މައުލޫމާތު ފުލުހުންނަށް ލިބިފައިވަނީ ރޭގެ، 21:29 ހާއިރުގައި ކަމަށެވެ. އަދި އެހާދިސާގައި އެއްވެސް މީހަކަށް ގެއްލުމެއް ލިބިފައި ނުވާކަމުގައި ފުލުހުންގެ އިދާރާއިން ވަނީ ވިދާޅުވެފައެވެ.

މިމީހާގެ އިތުރުން ފުލުހުން ވަނީ އިތުރު 8 މީހަކުވެސް މިއަދު ތޮއްޑޫއިން ހައްޔަރުކޮށްފައެވެ. އެމީހުން ހައްޔަރުކޮށްފައި ވަނީ މިމަހުގެ 5 ވަނަ ދުވަހު ތޮއްޑޫ ކައުންސިލް އިދާރާއަށް ގައު އުކައި ހަމަނުޖެހުން ހިންގުމުގެ ތުހުމަތުގައެވެ.

ތިއްޑޫގެ ދަނޑު ބިންތައް އަތުލަންއުޅޭ ކަމުގައި ބުނެ އެރަށުގެ ބައެއް ރައްޔިތުން އަންނަނީ ހިތްހަމަ ނުޖެހުންތައްފާޅުކުރަމުންނެވެ.