ސައޫދީއަރަބިއްޔާއަށް ހައްޖު މަހުގެ ހަނދު ސާބިތު ވުމާއި ގުޅިގެން ރާއްޖެއިންވެސް ހައްޖު ދުވަހުގެ ފުރަތަމަ ދުވަހަކީ މާދަމާ ކަމަށް ކަނޑައަޅައި މިނިސްޓްރީ އޮފް އިސްލާމިކް އެފެއާޒުން އެކަން އިޢުލާނު ކުރައްވައިފިއެވެ.

ރާއްޖޭގައި ޢަމަލު ކުރަމުން އައި ކަލަންޑަރުގައިވާ ގޮތުން މާދަމާއަކީ ޛުލްޤައިދާ މަހުގެ 30 ވަނަ ދުވަހެވެ. އެހެން ނަމަވެސް މިއަދު އިރު އޮއްސުނު އިރު ސަޢޫދީ ޢަރަބިއްޔާގެ ސަރަހައްދުތަކަށް ހަނދުފެނި، ސަޢޫދީ ސަރުކާރުން މިހިނގާ 1445 ވަނަ އަހަރުގެ ޙައްޖުމަހުގެ ފުރަތަމަ ދުވަހަކީ، މިޖޫންމަހުގެ 7ވާ ހުކުރު ދުވަސް ކަމުގައި ކަނޑައެޅުމާއި ގުޅިގެން އެގޮތަށް ރާއްޖެއިންވެސް ޢަމަލު ކުރުމަށް ވަނީ ނިންމަވާފައެވެ.

އެހެންކަމުން ސަރުކާރުންނާއި އަމިއްލަ ފަރާތްތަކުން ޗާޕުކުރައްވައި ނެރުއްވާފައިވާ ކަލަންޑަރުގައި ހިޖުރީ މަސް 1 ދުވަސް އަވަސްވެގެން ދާނެއެވެ.

ސަޢޫދީޢަރަބިއްޔާއަށް ހައްޖުމަހުގެ ހަނދު ސާބިތުވުމާއި ގުޅިގެން، މިއަހަރުގެ ހައްޖު ދުވަހަކީ، ޖޫން 15ވާ ހޮނިހިރު ދުވަސްކަމަށާއި، އަޟުޙާ ޢީދު ދުވަހަކީ، ޖޫން 16ވާ އާދީއްތަ ދުވަސްކަމުގައި ވަނީ ހަމަޖައްސަވާފައެެވެ.