މަޖިލިސް ކުރާގޭ ކައިރީގަ އޮންނަ ޕާކިން ޒޯނުގައި ހުރި ސައިކަލްތަކުގައި ރޯކޮށްލިކަމުގެ ތުހުމަތުގައި މީހަކު ހައްޔަރުކޮށްފިއެވެ.

ފުލުހުންގެ އިދާރާއިން ވިދާޅުވީ، ސައިކަލްތަކުގައި ރޯކޮށްލިކަމުގެ ތުހުމަތުގައި ހައްޔަރުކޮށްފައި ވަނީ، 36 އަހަރުގެ ދިވެހި ފިރިހެނެއް ކަމަށާއި އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޟިރު ކުރުމުން އޭނާގެ ބަންދަށް ކޯޓުން 30 ދުވަސް ޖަހައިދީފައިވާ ކަމަށެވެ.

ރައްޔިތުންގެ މަޖިލިސް ކުރާގޭގެ އުތުރުން ހޮޓެލް ޖެން އާއި ކުރީގެ ދަރުމަވަންތަ ސްކޫލުގެ ބާ އިމާރާތާއި ދެމެދު އޮންނަ ޕާކިން ޒޯނުގައި ހުރި ސައިކަލްތަކުގައި ރޯކޮށްލާފައި ވަނީ، ހޯމަ ދުވަހުގެ ރޭ މެންދަމުން އަލިވީ ފަހުންނެވެ. ފުލުހުންގެ އިދާރާއިން ވިދާޅުވީ، ހާދިސާގެ ރިޕޯޓް ފުލުހުންނަށް މެންދަމުން އަލިވެ 3:03 ގައި ކަމަށެވެ.

އަލިފާން ރޯކޮށްލުމުގެ ސަބަބުން އެ ޕާކިން ޒޯނުގައި ހުރި 7 ސައިކަލާއި، ވޭނަކަށް ބޮޑެތި ގެއްލުންތަކެއް ލިބުނެވެ. އަދި ބައެއް ސައިކަލްތައް ވަނީ ބޭނުން ނުކުރެވޭ ވަރަށް އަނދައިގެން ގޮސްފައެވެ.