ޑެންގޫހުން ޖެހިގެން މާލޭގައި 9 އަަހަރުގެ ކުޑަކުއްޖަކު ނިޔާވެއްޖެއެވެ.

ނިޔާވެފައި ވަނީ މާލެއަށް އުފަން، އުމުރުން 9 އަހަރުގެ ކުޑަ ފިރިހެން ކުއްޖެކެވެ.

ނޫން.އެމްވީއަށް އެނގިފައިވާ ގޮތުގައި ޑެންގޫހުން ޖެހުނު އެކުއްޖާ ނިޔާވީ ހާލު ދެރަވެ މިއަދު ހަވީރު 5:00 ޖަހާ އެހާކަންހާއިރުގައެވެ. ކުޑަކުއްޖާގެ ހާލު ދެރަވެގެން އިންދިރާގާނދީ މެމޯރިއަލް ހޮސްޕިޓަލަށް ގެންދިޔައީ ހަވީރު ކަމުގައި އެނގިފައިވެއެވެ.

އޭޕްރީލް މަހުން ފެށިގެން މާލެ ސަރަހައްދުގައި ޚާއްސަކޮށް ހުޅުމާލޭގައި ޑެންގޫހުން ވަނީ އިތުރުވެފައެވެ.

މާރިޗު މަހުގެ 25 އިން މެއި މަހުގެ 4 ވަނަ ދުވަހާއި ހަމައަށް ހުޅުމާލެއިން، 142 މީހުންނަށް ޑެންގޫހުން ޖެހުނު އިރު އެމުއްދަތުގައި، މާލެއިން ޑެންގޫހުން ޖެހިފައި ވަނީ 47 މީހުންނަށެވެ. އަތޮޅުތަކުގެ ތެރެއިންވެސް އެންމެ ބޮޑަށް ޑެންގޫހުން ފެތުރެމުން އަންނަނީ މާލެ އަތޮޅުގެ ރަށްތަކުގައެވެ. މާލެ ފިޔަވައި މާލެ އަތޮޅުގައި ހިމެނޭ ރަށްތަކުން ހުސްވި މަހުގައި 32 މީހަކަށް ޑެންގޫހުން ޖެހުނުކަމުގައި ރިޕޯޓްކޮށްފައިވެއެވެ.