އިންޑިއާގެ ބޮޑު ވަޒީރު ނަރެންދުރަ މޯދީއަށް ބީޖޭޕީ ކޯލިޝަނަށް ލިބުނު ތާއީދާއި އެކު، ތިންވަނަ ދައުރަކަށް އިންޑިއާގެ ބޮޑުވަޒީރު ކަމުގެ މަޤާމުފުރުއްވުމުގެ ފުރުޞަތު ލިބިވަޑައިގެންފިއެވެ.

ހަފްތާއަކަށް ދެމިގެން ދިޔަ އިންޑިއާގެ އާއްމު އިންތިޚާބު، ޤާނޫނު ހަދާ މަޖިލީހުގެ ތިރިގެ، ލޮކްޝަބާއަށް މެމްބަރުން އިންތިޚާބު ކުރުމަށް ނެގި ވޯޓުގައި ކުރިން ބީޖޭޕީން ހޯދާފައި އޮތް ސާފު މެޖޯރިޓީ މިފަހަރު އެޕާޓީއަށް ވަނީ ގެއްލިފައެވެ. ބީޖޭޕީއަށް ސަރުކާރު އެކުލަވާލަން ބޭނުންވާ 272 ގޮނޑި ލިބިފައި ނުވި ނަމަވެސް އެޕާޓީއާއިއެކު އިއްތިހާދުވެފައިވާ ޕާޓީތަކަށް ލިބުނު ގޮނޑީގެ އަދަދާއިއެކު، ބީޖޭޕީއަށް ސަރުކާރު އެކުލަވާލުމަށް ވަނީ ފުރުޞަތު ލިބިފައެވެ.

ވަގުތީ ނަތީޖާތަކުން ދައްކާ ގޮތުގައި، ބީޖޭޕީ ހިމެނޭ އެންޑީއޭ ކޯލިޝަނަށް ވަނީ 293 ގޮނޑި ލިބިފައެވެ. ބީޖޭޕީއަށް އެކަނި ލިބިފައި ވަނީ، 240 ގޮނޑިއެވެ. އިންޑިއާގެ އިދިކޮޅު ޕާޓީ އިންޑިއަން ނެޝަނަލް ކޮންގްރެސް ހަދާފައިވާ ކޯލިޝަނަށް ލިބިފައިވަނީ 232 ގޮނޑިއެވެ.

އިންތިޚާބުގެ ރަސްމީ ވަގުތީ ނަތީޖާތަކަށް ބަލާއިރު މިއިންތިޚާބުގައި ބީޖޭޕީއަށް މިހާރު އެޕާޓީއަށް ލިބިފައި އޮތް 63 ގޮނޑި ގެއްލިފައިވެއެވެ. އަދި ރާހުލް ގާންދީ ލީޑަރުކަން ކުރައްވާ އިންޑިއާ ނެޝަނަލް ކޮންގްރެސްއަށް އިތުރު 47 ގޮނޑު ކާމިޔާބު ކުރެވުނު އިރު، މިި އިންތިޚާބުގައި އެޕާޓީއަށް ޖުމުލަ 99 ގޮނޑި ލިބިފައިވެއެވެ.