ސަރުކާރުގެ ސްކޫލްތައް އޭސީ ކުރުމަށް ފެށި "ކޫލް ސްކޫލް" ޕްރޮޖެކްޓަކީ ހަމައެކަނި ކްލާސްރޫމުތައް ފިނިކުރުމަށް އޭސީކޮށްފައި އެކަނި ނިންމާލާނެ ޕްރޮޖެކްޓެއް ނޫން ކަމުގައި މިނިސްޓަރ އޮފް އެޑިޔުކޭޝަން ޑރ. އިސްމާޢީލް ޝަފީޢު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ސަރުކާރުގެ ހުރިހާ ސްކޫލުތައް 2 އަހަރު ދުވަހުގެ ތެރޭގައި، ކޮމިއުނިޓީތަކާއި ގުޅިގެން އޭސީކޮށް ނިންމުމަށް އަމާޒު ހިފައިގެން ފެށި ޕްރޮޖެކްޓް "ކޫލް ސްކޫލް" އިފްތިތާޙް ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

މިނިސްޓަރގެ ވާހަކަފުޅުގައި ވިދާޅުވީ، ކޫލް ސްކޫލެއްގައި ހިތަސް ފިނިކަން ލިބޭނެ ކަމަށާއި، އުފާވެރިކަން އިޙްސާސް ވާނެ ކަމަށެވެ. އަދި ފިނިކަމާއި އެކުގައި ދަރިވަރުންގެ އުޅުމާއި ސްލޫކަށް ހެޔޮ ބަދަލުތަކެއް އަންނާނެ ކަމުގައިވެސް މިނިސްޓަރ ވިދާޅުވިއެވެ.

މިނިސްޓަރ އޮފް އެޑިޔުކޭޝަން ޑރ އިސްމާޢީލް ޝަފީއު ވިދާޅުވީ، ސްކޫލުތައް ފިނިކުރުމުގެ ޕްރޮޖެކްޓަކީ ރައީސްގެ ޚާއްޞަ އިރުޝާާދާއިއެކުގައި ކުރިޔަށް ގެންދެވޭ ޕްރޮޖެކްޓެއް ކަމަށެވެ. އަދި މމިޕްރޮޖެކްޓް ކުރިޔަށް ގެންދިޔުމުގައި، އިއާދަކުރަނިވި ހަކަތަ ބޭނުންކުރުމަށްވެސް ރައީސް އިރުޝާދު ދެއްވާފައިވާ ކަމުގައި މިނިސްޓަރ ވިދާޅުވިއެވެ.

މީގެ އިތުރުން ތާރީޚީ މިފަދަ ޕްރޮޖެކްޓެއް ފުރަތަމަ އަތޮޅުތެރޭގެ ރަށެއްގައި ފެށިގެން ދާކަމަކީވެސް، އަތޮޅުތަކުގެ ރަށްތަކަށް ރައީސުލްޖުމްހޫރިއްޔާ ދެއްވާ އިސްކަން ހާމަވާ ކަމެއް ކަމެއް ކަމުަގއިވެސް މިނިސްޓަރ ވިދާޅުވިއެވެ.

މިޕްރޮޖެކްޓްގެ ދަށުން ފުރަތަމަ ސްކޫލަކަށް މާފުށީ ސްކޫލުގެ ކްލާސްރޫމްތައް އޭސީ ކުރުމުގެ މަަސައްކަތް ކުރާނީ މާފުށީ ކައުންސިލުން ޚަރަދުކުރައްވައިގެން މާފުށީ އެރަށުގެ ލޯކަލް އޮތޯރިޓީ ކުންފުންޏާއި ހަވާލުކޮށްގެންނެވެ. ކްލާސްރޫމްތައް އޭސީ ކުރުމުގެ މަސައްކަތް އެއްމަސްދުވަހުގެ ތެރޭގައި ނިންމާލެވޭނެ ކަމުގައި މާފުށީ ކައުންސިލުން ވަނީ ވިދާޅުވެފައެވެ.